Tura, December 9, 2021: Re•anggipa Butbar salo New Tura, Law Kolege kal•chakram biapo dal•gipa tom•bimonganiko ong•ate, Garo Hills-ni MPCC ba Indian National Congress (INC)-ni membor-rang sak 6,000-na bate All India Trinamool Congress (AITC)-o napangtokaha.
MPYC-ni gitcham President Richard Mrong Marak-ni u•iata gitade, Garo Hills-o donggipa district dambongani chadamberang Butbar salo New Tura, Law Kolege kal•chakramo jinma tom•bimonganio, Richard Marak-ni dilanichi rally-ko ong•ate Garo Hills-ni chadamberang sak hajal bate Congress doloni ong•katenba AITC-o napangskaha.
Youth Congress-ni gitcham President Richard M.Marak tom•anio jinmana aganengon, “Garo Hills-o donggipa dam 24 Assembly Elakkarangoni Youth Congress dilgiparang, Committee membor-rang aro volunteer-rang AITC-o napaha” ine parakataha.
Garo Hills gimikni sak hajal dokna baten Congress-ni membor-rang AITC dolo napaha ineba Richard Marak parakatenba uamangni mongsonggipa mingsa miksonganiara a•songo bilrangko jakkalsretanirang aro ong•gija kamrangko ka•enggiparangni kosako warchakanian uamangni dal•batgipa dakgrikani ong•a ineba ua aganangaha.
“Chinga a•songo melinanngrimgijagipa, kangal cha•asianiko ra•bagipa aro kakket ong•gija kam ka•giparangni kosako dakgrikanggen aro chinga a•doko BJP aro NPP sorkarini ong•gijagipa champengatanirangko ra•galna jotton ka•gen” ine Richard Marak aganangaha.
Iarang gimikko kam ka•na re•baenggipa 2023-24 bilsiko chinga nisan donenga. Una agreba “AITC-o napaniko dontonggijan dakanggen aro re•baenggipa salrango bang•bata manderang AITC-o naptokgen” ineba ua agandapangaha.