Renang Dare kosakko ban kachange pipe line ra•anganina songni manderang jegale DC-na lekka sedoa
Baghmara, December 9, 2021: South Garo Hills a•jani Dabalgre aro Nokatgre songo donggipa Garo Hills-ni damsa mingsinggipa, nina nitobegipa aro rona an•senggipa “Renang Dare” ba “Chi Ontimram” chiringoniko sorkari Jal Jeevan Mission (JJM)-ni gita dam ba ban kachange dingtang dingtang songrangona chi pipe line ra•angengani gimin song damgnini Nokmarang aro songni manderang badi ka•an baksa jegale South Garo Hills a•jani Deputy Commissioner (DC)-na Bristibar salo lekka sedoataha.
Dabom Ch.Marak-ni DC-na seatgipa chittio janapatani gitade, a•dok sorkarini songanti nokaantiona ringani chi pipe linerangko sokate on•na gita JJM-ko a•bachengate on•anina namen kusi ong•achim, indiba sorkari mandena pangkamgipa janggi tangani cholko on•genchimoba A•chik a•songni nitoriri ong•telaigipa gamko ripingna aro ecosystem-ko chel•chakesa namroro sileoroaniko ra•na nangachim ine suk ong•gijaniko parakataha.
Batanggimin adita jarangna skang PHE department-ni manderang Dabalgre aro Nokatgre songona re•bae songnini Nokmarango sing•chenggija aro maming bi•gija am•gija skatang drae Renang Dare chiringko dam kachange chi pipe line ra•angna kam a•bachengataha.
Renang Dare damsa A•chik a•songni nitogipa tourist spot ba biap ong•a aro ua biapona bang•a gipin a•songni manderang rona aro biap nina re•baronga, uni gisepon Renang Dare chiring kosakko dam kachange chi pipe ra•angode, chiring rang•san tipange Dabalgre aro Nokatgre songni mikim raaong ba A•chik a•songna dal•a gimaani ong•gnok, uni gimin Dabalgre aro Nokatgre songni Nokmarang aro songni manderang Renang Dare chiring kosakko dam kachange pipe line ra•anganiko raken jegala aro ra•angna on•jawa ine Dabom Marak janapataha.
Department-ni bil gnanggipa manderang ia ong•enggipa obostako name dake sing•sandianiko dake namgipa solution-ko ra•bae nitogipa Renang Dare chiring ka•maoniko dam kachange pipe line ra•anganiko songni manderang maming dakeba champengani dongjawa aro sorkarini kosako matnangani dongjawa, uamang baksa apsan ku•monge mission-ko chu•sokatna kamko ka•anggen ineba songni Nokmarang aro manderang janapataha.