Baghmara, December 10, 2021: South Garo Hills a•jani Dambuk-o dongipa GHADC, Inspection Bangalow (IB) ba Guest House-ko adita bilsirangna GHADC tarigija galchipe donenga ine songni manderang u•iataha.
Dambuk-o GHADC-ni rike donenggipa IB nosto ong•engahani gimin uko taridape on•china changni chang songni manderang u•iathachim, indiba da•alona kingkingba ua IB-ko taridape on•kuja ine u•iataha. Mikka wachi somoio ua IB-ni tinrang nosto ong•ahani gimin mikka selani a•sel waltuna re•bagipa manderang neng•nikaniko man•enga ineba janapataha. Ua IB-ko mangrakatgipa mongsonggipa krong, bilbang aro pakmarangko a•kin cha•e nosto ong•enba be•gruna am•e dongengaha ineba songni manderang u•iataha.
Je mmanderangan Dambuk IB-o waltuani ba dongchakani parako tangka gamangengachim, ua tangkarangko IB nirokgipa jaanti District Council-na chimonge on•atenga aro man•a dipet IB-ko rongtale rakkienga ine IB-ko nirokgipa u•iataha.
Indakgipa IB-rang Garo Hills-o bang•en gnang, indiba GHADC-ni dilgiparang nirokgija galchipe donengani a•sel songre songgabatgipa manderang waltuna aro saldongna neng•nikaniko man•tokenga ine u•iataha.
Garo Hills-o GHADC-ni IB-rang bang•en gnang, indiba uarangoni namkalgipa IB-rangara Arbella, Chisobibra, Raksamgre aro Ranggira Guest House-san ong•aia ine songre songgabatgipa manderang janapataha.