Resubelpara, March 19, 2022: North Garo Hills a•jani Dainadubi aro uni wilwilao songdongenggipa manderang da•al Sonibar salo gital Dainadubi C&RD Block-ko songe on•china dabie jinma re•jomaniko ba public rally-ko ong•atangaha.
Ia re•jomaniko Dainadubi Bangsi Playground ba kal•chakram biaponi a•bachenge jinma re•jomaha aro ia rally-o bang•bea manderang re•bae bakko ra•angtokaha.
Ia gital block-na dabianiara gitalgipa ong•ja, batanggimin 2016 bilsion Dainadubi jolni manderang chanchirimaniko dakenba Dainadubi C&RD Block Demand Committee, re•chakataha. Indake re•anggipa 2018 bilsini December 31 tariko a•dokni Skotong Minister Conrad Sangma-ko gronge una memorandum-ko on•aha ine Dainadubi C&RD Block Demand Committee-ni President Jaffrey Momin kobor ra•timgiparangna aganaha.
Jaffrey Momin-ni agana gitade, ia gital Dainadubi C&RD Block-ko songe, Dainadubi-ko block-ni Skotong donachina dabiangaha. Maina Dainadubi-ni wilwilao donggipa songrang saliramchi Damas, salgrochi Chilpara, salaramchi Jambal aro salgipengchi Wageasi ong•achim.
Unbaksana Demand Committee-ni janapatani gitade, Dainadubi aro uni wilwilao nangchapgipa songrang ge•gni Resubelpara aro Kharkutta C&RD block-rangona rama chel•aniara km 30 ba 40 mangko re•rurae kam ka•na gita nangani gimin namen neng•nikaniko man•a. Unbaksana Dainadubi-ni wilwilao dam 102 songrang donga aro iano ge 6369 nokdangrang gnang, mande jela gimik sak 46519 donga, indake area dal•dugaani gimin kam ka•na amsokja ine Demand Committee-ni dilgipa janapataha.
Indake ong•engon, North Garo Hills a•jao Dainadubi-ara Resubelpara aro Kharkutta block ge•gnini gisepo bijangchigipa biapba ong•a ine janapatenba Demand Committee gital Dainadubi C&RD block-ko man•adipet ta•rake on•pachina Skotong Minister-ko mol•molangaha.
Indake Dainadubi C&RD Block Demand Committee, manderangni nangnikaniko Skotong Minister on•chongmotgen ine ka•donganiko parakatjolaha.