Bilsisa batpiloba badi ka•aniko segatjani gimin Pulis Officer-ni kosako badi ka•a
Williamnagar, September 22, 2022: East Garo Hills a•jani ning•o donggipa Dawa Gitinggre songni saksa Social Activist Nilbath Ch. Marak, Gasuapara Pulis Outpost-ni Officer In-charge-ni kosako badi ka•aha ine koborna u•iataha.
Nilbath Marak-ni u•iatani gitade, Gasuapara Pulis Outpost-ni Officer Incharge-ko niamgri Era A•ning, Dangsa A•we, Nongalbibra aro Jadi Gittim aro gipin South Garo Hills a•jani bang•a biaprangoniko niam gri koila bikote badingenggipa manderang baksa jak dongpaani gimin, re•anggipa 2021 bilsini July 6 tariko badi ka•ani mamlako segatgija donani gimin uni kosako badi ka•skaha.
“Sakgni manderang Era A•ning, Dangsa A•we, Nongalbibra aro Jadi Gittimoniko niam gri Supreme Court-ni dongimin niamko pe•e, koilarangko bikotenba Bangladesh-ona watatenga. Supreme Court aro NGT-ni dongimin niam gitade, Meghalaya a•dok gimikon koilarangko bikotna on•jachim. Indiba uamang manigija koilarangko bikote bading chiwalna license-rang dongja. Indake 2021 bilsini July 6 tariko, anga niam gri koila badingenggipa sakgni manderangni kosako badi ka•aha. Uamang E-way bill gita badingna chu•onga challan aro gipin lekkarang dongja. Uasan ong•aigija, niam gri koila badingenggipa sakgni manderangko, ia obostarangni bidingo Authority-na u•iatgenchimode, uamang angko so•ote galgen ine ka•mikkenatani kattarangko angna parakataha. Ia obostarangko anga apsan ra•chape, Gasuapara Pulis Outpost-ni Officer In-charge-na lekka sedoatenba badi ka•aha aro uamang sakgniko niamo pangchake sastiko on•china janapatjolaha. Indiba Gasuapara Pulis Outpost-ni Officer In-charge da•alona kingkingba angni badi ka•aniko segatjaha aro maming sing•sandianiko dakjaha” ine Nilbath Ch Marak janapataha.
“Pulisrang an•chingko namgijaoniko naljokatgipa aro dos gnanggipa manderangko dosni kri niamo pangchake sasti on•gipa, niamko ja•rikgipa manderang ong•a. Indiba Gasuapara Pulis Outpost-ni Officer In-charge angni badi ka•aniko bilsisa batpile mamlako segatjaha. Ua CrPC-ni niamrangko u•ijae, segatjahama ma koila badinggipa manderang baksa melie segatjahama, iani bidingo, court-sa ma•siaignok. Supreme court aro NGT a•doko koila bading chiwalaniko dontongchina raiko on•genchimoba, uamang da•alona kingkingba koilarangko bading chiwalenga. Uamang Gasuapara Pulis Outpost-ko re•pake badingenga. Iani bidingo pulisrang ja•ku de•na nangchongmota, maina ian court-ni dongimin niamko pe•ani ong•enga. Ia obostarangni bidingo badi ka•genchimoba pulisrang bilsisa batpiloba badi ka•aniko segatjaha. Uni a•sel anga Gasuapara Pulis Outpost-ni Officer In-charge-ni kosako badi ka•enga” ine Nilbath Marak parakataha.