Tura, January 22, 2022: A•dokni sorkari ge•e game cha•giparangna FOCUS scheme-ni tangkako on•na ku•rachakaha. Indiba FOCUS Scheme-ni dakchakaniko bang•a beneficiary-rangan da•onaba man•kujaenga ine Tura-ni MDC Bernard N.Marak parakataha.
“FOCUS Scheme-ni tangkako man•pana bimingtangko segatatgipa manderangni mobile phone-ona gong 5000 tangkako account-ona chipataha ine manderangna SMS sokenga. Indiba account-ni tangkako check ka•e niode, account-ona gong•saba napja. Unbaksana Old Age Pension, Widow Pension, Specially Abled Pension-rang apsan obostako chagrongna nangenga. Modi-ni dilanichi BJP sorkari Meghalaya a•dokna sokatenggipa chu•gimik tangkarangko a•dokni dilgiparangsa jakkalsretenga. Self Help Group-rang, jemangan FOCUS-na bimingtangko segatahachim, uamangoni mitamang FOCUS-ni tangkako man•enga, mitam dolrang FOCUS-ni on•gipa tangkako man•ja. Uni ja•pang ja•dilko dilgiparang, beneficiary-rangko seokani niamko u•iata dongja. Indide maio pangchake kangal cholgrirang FOCUS scheme-ni dakchakaniko man•pagen, ua tangkana ka•donge manderang bimintangko segatahachim, indiba uamangko maina changala? Uasan ong•aigija, Model Code of Conduct-ni ja•manoba mitam manderang tangka napani SMS-ko man•soaha, uni gimin ma•sina gita iani bidingo sing•sandianiko dakna nangchongmota ” ine Bernard Marak koboro janapataha.