Tura, Jan 23, 2023:GSU South Western Zone-ni President aro GSU-CEC, HQ-ni Assistant General Secretary Salman D.Sangma aro gipin sak 40-na bate Sombar salo Ampati-ni MLA Miani D.Shira, State Mahila President Selma D. Shira, West Garo Hills District Coordinator Sapford N.Sangma, South Tura-ni TMC candidate Richard M.Marak, North Tura Block President Rollingstone Ch.Momin aro gipin TMC dilgiparangni dongpanio TMC baksa songgigrikaniko dakangaha.
Salman D.Sangma ru•uta bilsirangna GSU-ni dilgipa ong•e songsalna, jat aro a•songna dangdike on•angaha. “Anga da•alo GSU-ko namnikjae, wata ong•ja, indiba gital gital chadamberang GSU-ko re•dilangchina anga cholko on•na sika” ine aganaha.
Unbaksana, “Angni TMC dolo napanide a•dok sorkarini kamko namnikjae, maidakode a•dokni manderangna namroro silroroaniko ra•bana man•gen aro badia political dol jat aro a•songna kakket ong•e, kamko ka•gen, uko anga study ka•aha. Angni study ka•e nikani gitade, TMC dolna agrede gipin political dol jat aro a•songna kakket ong•e kam ka•na man•jawa ine anga nikaha, uni giminsa anga kakket ong•e, jat aro a•songna kam ka•gipa aro bil ganggipa dolko baseon, TMC dolko nman•aha. Indake anga mikkangchi an•tangni bil amadipet TMC baksa ku•monge, jat aro a•songni namgnina kamko ka•angna miksonge TMC dolo napaha. Dr Mukul Sangma-ni Skotong Minister ong•e, a•sokko re•dilmittingo bang•a namroro silroroanirangko ra•baha, indiba uarang gimikan da•ode gimaaha. Uni gimin da•alo angni TMC-o napani miksongade, kam gri dongenggipa chadamberangna namgipa janggi tangani cholko on•na, TMC baksa bakrime kamko ka•angna, TMC-ko bilakatna, a•doko TMC sorkariko rikna rakbate kamrangko ka•angna miksongani ong•a. Uni gimin kam gri dongenggipa chadamberangni neng•nikaniko, lekka porani gadangko namdapatna aro game cha•giparangna namgipa janggi tangani cholko on•na gita Dr. Mukul Sangma-na agre darangba dongja. Uni gimin an•ching sakantian apsan giaik dondime TMC dolna kamko ka•angna” ine Salman D.Sangma sakanitiko mol•molangaha.
Salman D.Sangma baksa gipin sak 40-na bate TMC-o bakrimegipa sakantikon, Miani D.Shira aro South Richard Marak TMC dolni palo kusi ong•bee rimchaksoaha.
Salman D.Sangma, TMC dilgiparangni mande ra•bee rimchaksoanina TMC dilgiparangko gisik ka•tong gimikchi mittelatskaha.