Tura, August 12, 2022: Federation of Khasi Jaintia and Garo People (FKJGP) Garo Hills Zone, Bristibar salo West Garo Hills a•jani Deputy Commissioner-ko gronge lekka segiminko on•angaha.
FKJGP, GHZ-ni Addl. General Secretary Rohit R.Marak-ni janapatani gitade, Garo Hills-ni dingtang dingtang biaprangoni Tura songjinmao skul poraienggipa chatro chatrirang re•a doanio bang•en neng•nikaniko man•enga. Chel•a songni mitam chadamberang Tura-o nok para donge poraienga, mitamrang km 30 mang chel•aoni bus garirango re•rurae skie ra•tokenga. Indiba Garo Hills-ni dingtang dingtang songrangoni ba biaprangoni Tura songjinmaona re•rurae poraienggipa chatro chatrirangko bus garirango gatna jechakenga.
“Line Bus-rango salanti skul re•rurenggipa chatro chatrirangko, bus garini driver aro conductor-rang gatna jechakanirangko kobor man•soaha. Poraienggipa chadamberang gipin manderang gita apsan bus pararangko gamna man•jani a•sel, uamangko bus garirango gatjaenga ine ma•sina gita man•aha. Chinga Bus garirangko salanti chalaienggipa manderangni neng•nikanikoba ma•sichaka. Indiba bidako skie ra•na bus garirango skulchi re•ruraenggipa chatro chatrirangoniko ramram manderangniko bara ra•a gita apsan gari bararangko ra•na nangja. India sorkari poraienggipa chadamberangna rail-rango songree poraina indin on•a, apsandaken Garo Hills-ni Line Bus garirango indin tangka ra•gija poraienggipa chatro chatrirangko gatna nanga. Bang•a Line Bus garirango re•rurae poraienggipa bi•sarangko gatjani a•sel uamang chel•begipa ramarangko ja•achi re•na gita nangenga. Mitamrang Skul jokmane Bus garirango gatangjani a•sel sali walchipile Tura-oni Mukdangra songrangona ja•achi re•angpilna nangenga. Uni gimin ia ong•enggipa obostarangko ta•rake ja•ku de•na nanga” ine FKJGP GHZ, DC-ko mol•molataha.