Tura, September 15, 2022: Tura bajarni wilwilao donggipa Sweet and Confectionery Association (SCA)-ni President Daulat Chada Marak, “Tura-ni MDC Bernard Marak aro Meghalaya Chamber of Commerce (MCC) cha•ani damrangko bariatanio maming jak dongja” ine jegalataha.
Daulat Marak-ni u•iatani gitade, Meghalaya Chamber of Commerce aro MDC Bernard Marak, Tura bajaro palenggipa cha•anirangko dam barianio maming jak dongja. Bernard Marak aro MCC, Sweet and Confectionery Association-ni manderangna dakchakanirangkosa on•enga, uni kosako dagrange cha•ani damrangko bariatani dosko galaniara tol•e matnanganisa ong•aia. Association-ni membor-rang maiba dakchakaniko nangengode, ua pangnan jechakgija dakchakaniko on•ronga ine parakataha.
“Sweet and Confectionery Association-ni ka•rimskarangsa jinma apsan chanchirime cha•ani tarina jakkalenggipa rokomanti bosturangni damrang barianiko nigrikesa, 2022 bilsini May jao cha•anirangko dam bariataha. Chinga Association-ni manderangsa ku•monge damko bariataha. Bernard Marak aro Meghalaya Chamber of Commerce-ni kosako matnange dos galaniara tol•anisan ong•aia. Ua (Bernard) maming saloba dokkanrangchi re•ange bosturangni damko bariatna dagrange aganna dongchongmotja. Indake bang•a manderang cha•a ring•anirangni dam barianiko nike uamangni neng•nikanirangko nigrike, chinga gital cha•ani damrangko den•gale, gitcham damon cha•anirangko palna tik ka•angtaiaha” ine Daullat Marak agandapataha .