Tura, May 25, 2022: A•dokni gitcham Skotong Minister aro Warachakenggipa dolni dilgipa Dr. Mukul Sangma Monggolbar salo Meghalaya aro Assam a•dok sorkariko sima ari jolo songdongenggipa Tribal manderangko ka•mikkenatjachina didiataha.
Dr Mukul Sangma-ni kobor ra•timgiparangna aganani gitade, a•dokni sima ari jolo songdongenggipa manderangko May 23 tariko Assam pulisrang kam ka•enggipa me•chikmarangko dokna satna am•e, so•sojengjeng ong•ata baksana ka•mikenataha.
Social Media-rango Vedio ka•e watgiparangko niksoani gitade, Mallang Salbari songni manderang bostu donchakna nok rikenggipa biapona Assam pulisrang re•bae kam ka•anirangko dontongatani a•sel kajia ong•aniko nikenba Dr Mukul Sangm Assam pulisrangni kamko raken jegalataha.
“Indakgipa obostarang ong•jachina re•anggipa 2010 bilsion Meghalaya a•dokni manderang aro Assam a•dokni manderang gipin a•dokona napdrae kajia golmal ka•gija, melie nangrime dongna tik ka•aha. Ia ong•anggimin obostani bidingo a•dok ge•gnini dilgiparang ta•raken tom•e chanchirimaniko dake tom•tomaniko ra•bana nangchongmota. Assam pulisrang Tribal manderangni gam jinko ra•sekna miksonge A•chikrangni songona napbae so•sojengjeng kajia a•botenga aro kragija dokna satna jotton ka•enga. Assam pulisrang India a•songni niam-bidiko parakatgimin gita Schedule Tribe (ST) aro Schedule Caste (SC) manderangko dingtangmancha naljoke rakkina ra•gatgipa niam gnang. Assam pulisrang Parliament-ni see jote rakkigimin niamko pe•e ST manderangni a•kanggimin Meghalaya a•dokona napdrae kam ka•anirangko dontongataniara niamni a•palo ong•chongmota. Unbaksana me•chikrangko chel•chakani pal batesa uamangni kosako kragija ja•ku de•aniara niamko ma•sigijagipa manderangni kamsa ong•a. Iandakgipa Assam pulisrangni kamko darangba ra•chakna man•jawa aro sinjetako man•gipa manderangna kakket bichalko ra•bana nanga” ine Dr Sangma janapataha.
Ia obostani bidingo Meghalaya aro Assam sorkari dolgni chanchirimaniko dakenba ta•rake ja•ku de•aniko dake dos dakgipa Assam pulisrangko sasti on•na nanga aro duko ga•akenggipa songni manderangna chel•chakaniko on•na nanga ineba Dr Sangma janapataha.