Shillong, Jan 31, 2023: Meghalaya TMC-ni gimin, NPP-ni agantimgipa Dr M Ampareen Lyngdoh-ni aganani gitade, AITC a•dokni manderangna nama kamrangko ka•ana bate BJP-ko matnange sala sienga ine janpataha.
“Meghalaya-o cheaniara TMC-ni a•song gimiko dakna miksongniko ja•ku de•anisan ong•aia” ine ua aganaha.
TMC-ko Salgro-Salaramni ku•rang ine aganna man•ja maina uamang Meghalaya-ko u•ija. Jekai, bakki cardrangchi Kror 3000 tangkarangko dingtang dingtang kamrangna sualatna ku•chakaniara pensionrang aro dormaha gamaniko dontongatjaskalde, ong•na amgijani ong•a, maina an•chingni namroro-silroroanina nanggipa korosrang Kror 4000 ong•a.
Dr Lyngdoh, TMC me•chikrangni janggi tanganiko namdapatna krenge miksonganiara a•doko ong•enggipa obostarangko nigija chanchininggija tariani ong•a ineba agandapataha. Uamang bilsiprako ge 1,200 SHG-rangko bikotna gita scheme-rangko a•bachengatna miksonganirang donga, indiba sorkari batanggimin bilsi 5-o ge 7,500 SHG-rangko bilsiprako bikotna man•aha, uandake iarangchin an•chingni a•doko namroro silroroani gimin u•ija ine namen nikna gita man•enga.
Dr. Mukul ia obostarangni bidingo changsaba janapa dongja aro iara party-ni dal•giparang baksa meli-nangrime chanchirimgrikani dongjani a•sel ong•naba gnang.
Adita salrangna skang, Bengal a•dokko chalaienggipa official-rang namroro silroroanina tikatgimin tangkarangko bi•anina Mamata Banerjee-ni manengako video-o nikaha, jeon ua Kror 1.6-na bate Bengal me•chikrangna scheme-ko sualani ja•mande tangkarang dongjaha ine janapaha. Ia apsan obosta Meghalaya-oba ong•na sienga. Name chanchisamsoagija kamrangko ka•ode, Meghalaya-ko ia scheme-rang bilsi 30 rang ja•manchakatgen.
West Bengal-o, skigiparang aro kam ka•giparang DA-na sorkarini kosako jegalanirangko aro national standards-ni gita dormahako on•china dabianirangko dakenga. High Court-ni gitaba a•dok sorkariko tangka gamachina hukum-ko on•ahachim, indiba sorkari da•onaba uko dakkuja. West Bengal-ni skotong minister cholgri-apgri aro galchipako man•gipa a•dokni manderangna janggi tanganiko tang•doatna dingtang dingtang project-rangchi krenge kamko ka•enga aro iani a•selsa gamanirang ja•manchakenga ine uamang aganchakaha. Meghalaya-o apsan dakgipa obosta ong•genchimode baditan neng•nikanirangko man•gen.
Da•o TMC-ni basegimin dilgiparang uamangni skango bilsi 8-na sason ka•mitingo nanga gita namroro silroroaniko ra•bana man•jaha aro da•o tusiaoni chakatpila gita chacha Bengal-ni scheme-rangko gipatna jotton ka•enga. Ia apsan dilgiparangan Meghalaya-ko an•seng baljolanio, skia-porao, janggi tangani gadang aro gipinrango namen tang•onataha. SHG-ni dilgiparang janggi tangani cholrangko niatgenchimode, 2018 bilsiona kinhking ge 5,000 SHG-rangsan ong•aiachim. Indiba NPP sorkari bilsi 5, sason ka•anio sorkari SHG-rangko ge 43,000-ona bariataha. Uni aganani gitade, Meghalaya-o nambata gadango silroro namroroanirangko nikna man•enga, aro Meghalaya-ni manderang PA Sangma sagio aro uni kamrango ka•donganirang dongkuenga. Meghalaya-ko nambatgipa ong•atna NPP namen krenge kamrangko ka•angkugen ineba janapataha.
Skotong Minister Conrad K Sangma adita salrangna skang AITC-ko a•dokoni party ong•ja ine aganaha. Banjop Pyngrope-ni adita salrangna skang AITC-ni bidingo agananiko niatgenchimoba, TMC-ko “Bangla Party” ine agananiko niksona man•aha ine Dr Ampareen Lyngdoh janapataha.