Shillong, Jan 30, 2023:Meghalaya Legislative Assembly-ni gitcham Speaker Martin M.Danggo NPP doloni ong•kate, re•baenggipa February 27 tariko ong•atenggipa Assembly eleksino BJP ticketoni susana miksongenga ine kobor man•aha.
NPP Ranikor elakkao susana gita Martin M.Danggo-na party ticket on•manahachim, indiba ua rang•gitik chanchie NPP doloni ong•ataha.
Kobor man•soani gitade, Martin Danggo re•anggipa Sonibar salo Assam-ni skotong minister Himanta Biswa Sarma aro Meghalaya-ni gitcham cabinet minister AL Hek baksa Guwahati-o tom•e chanchirimanio dongpae tom•a matchotani ja•man BJP dolo napna chanchiaha.
Koborna parakani gitade, a•dokni BJP dilgiprang adita salrangna skangan, Martin Danggo baksa agangolpogrikaha. Indake Martin Danggo January 30 tarik Sombar salo NPP doloni resign ka•gen ine parakaha.
Indiba Martin Danggo, Shillong-o join ka•genma Delhi-o ka•gen namedake rongtalkuja ine u•iataha.
Indake ong•engon, BJP Martin Danggo-ni miksonga gita Ranikor elakkao chena ka•dongenga ineba parakaha.