Denajekgre PMGSY ramako taria matchotkujani a•sel songni manderang neng•nikaniko man•enga

Williamnagar, August 4, 2022: East Garo Hills a•jao donggipa Denajekgre songni saksa Watseng A Sangma, Bristibar salo pan akengmitting somoio boloni ga•ake namen saknaako man•aha. Indake saknaako man•gipa mandeko Hospital ra•angna rama namjani a•sel garirang re•angna man•jae songni manderang wa•ako strecher tarie Rongsak PHC-ona ra•angaha.

Songni manderangni u•iatani gitade, Rongsak bajaroni Denajekgre songona tarigipa PMGSY rama namjani gimin garirang re•angna man•jae sagipa manderangko tanggittik hospital ra•angna nangoba namen neng•nikaniko man•enga. Ia PMGSY ramako re•anggipa 2018 bilsioni tarina a•bachengaha, indiba da•alona kingkingba ia ramako taria matchotkuja. Sing•sandie nianio ma•siani gitade, ia PMGSY ramako tarina gita saksa contractor Ma SM Sangma-na kamko on•aha. Indiba ia contractor bilsi 5 ong•angpiloba PMGSY ramako matchote tarikuja.

“Chinga uni kamna bilongen suk ong•ja. Ia ramako matchote tarie on•genchimode, chinga re•a doanio indakpile neng•nikaniko man•jawachim ine songni manderang suk ong•gijaniko parakataha.