Shillong, August 4, 2022: A•dokni Home Minister (HM) Lakhmen Rymbui, Bharatiya Janata Party (BJP) dolni matnanganiko jegalatskaha.
Batanggipa salo BJP dol Bernard Marak-ko rim•anina, Pulisrangni kosako jegale jingjengatanirangko dakenba Bernard Marak-ni bagano donggipa noko me•chikrangko pale cha•enga ba ‘Brothel’ dake jakkalenga ine potchipe pulisrang Bernard Marak-ko rim•e Pulis Custody-o donenga. BJP dilgiparang Bernard Marak-ko gipin dolni manderangsa tol•e dosio ga•akataha aro ua re•baenggipa bilsio South Tura elekkao Chief Minister Conrad Sangma baksa eleksino susaangna chanchianiko ma•sie, uko bringbangatna dos galdrakaha ine matnange Pulisrangni kamko jegalangaha.
BJP dol, West Garo Hills a•jani Superintendent of Pulis (SP) Vivekananda Singh Rathore aro Deputy Commissioner Swapnil Tembe-ko NPP dolna mikpakma nie kamko ka•enga ine matnange uamangko kam ra•jitangchina didiangaha.
Budbar salo, BJP dolni agangipa kattarangko SP VS Rathore jegalatenba, Bernard Marak-ni kosako bang•a sakkirangko man•aha ine parakataha.
Indake ia obostani bidingo Home Minister Lakhmen Rymbui, “BJP dol Tura-ni SP aro DC-ko kam ra•jitangchina dabienga, indiba pulisrang kamtangko niamo pangchake ka•enga. Pulisrang uamangni ka•na nanggni kamko ka•aha. Indiba je Officer-an sorkarini ge•etgimin niamni kosako re•genchimode, uni kosako ja•kuko de•anggen” ine Home Minister parakataha.
Bernard Marak-ni mamlako Magisterial Inquiry dakenga aro anga bebe ra•a ta•raken chinga jinmana kakketko parakatgen ineba Lakhman Rymbui agandapaataha.