Tura, August 6, 2022: Tura elekka-ni MDC aro BJP State Vice President Bernard Marak-ko re•anggipa July 28 tarikoni sal 8-na Pulis Custody-o donani ja•man August 5 tarik Sukrobar salo Court-ona rimangaha, indake uko sal 6-na Pulis Custody-o donattaiaha.
“Tura-ni MDC Bernard Marak-ko Judicial Magistrate-ni mikkangona rimange mesokeaha. Chinga uko sal 6-na Pulis Custody-o donchina Court raiko on•ataha. Anga bebe ra•a, chingni dabianirangko Court knachakgen” ine West Garo Hills a•jani SP VS Rathore parakataha.
Bernard Marak-ko Garo Hills a•jaona rimbapilani ja•mano Chief Judicial Magistrate uko sal 8-na pulis custody-o donchina raiko on•aha.
Bernard Marak-ni baganko raid ka•anio Pulisrang rokomanti bosturangko man•taiaha unbaksana sak 5 bi•sarangko jokataha aro ua biapo bi•sa saksako drae til•ekaha ine medical test ka•anio rim•a man•aha. Indake February jaoba Bernard Marak-ni baganona me•chik bi•sa saksako rimange drae til•ekaha. Ia ong•anggipa obostako kobor man•e pulisrang Rimpu Bagan-ko chadrapeahachim.
Koborko man•soani gitade Policeni raid ka•ako nike Hub News mediako okamtgipara raid ka•a somoio ban cha•gipa manderangsa mediakode okamata ine u•isona gita man•aha. Indiba minggipin golposrikani kattarangara, Police rangni okamako man•esa media dol Rimpu baganona sokbaaha, aro noksarangko de•eaia. Minggipin jajaatani kattara SP aro uni dolrangni Raid ka•ani somoiko janapaniko chanchiatpiltaiato jajaaniko ra•baa. Skanggipa, somoiko janapaniara koborko man•soe waljatchiosa bi•apko raid ka•aaha ine u•iata, ja•man u•iatpiltaianiora attam 6 bajioni pringona koborko man•soe raidko a•bachengaha ine jinmana parakattaia.
Ia obostarangni bidingo Bernard Marak-ko Shillong Sadar Pulis Station-ona re•ange an•tangni dosko ku•rachakchina ge•etaha, indiba ua rim•a man•na kenne Guwahati-ona re•ange Delhi-ona sildorengo re•angna chanchiachim. Indiba High Command-ni maming dakchakanirangko man•jae ua Uttar Pradesh-chi re•ange donnueaha, jeon pulisrang nangrime kamko ka•enba uko rim•na man•aha ine koborna parakataha.
Gitalgipa koborrangko man•soanigitade, Rimpu bagano rogipa manderangko rim•chapanggipa bailko man•a gita komibeoba gong hajal 70 ko gamna gita nangaha ine rim•a cha•anggiparangoni saksa u•iataha.