Tura, September 16, 2022: Bharatiya Janata Party (BJP) Tura City District Committee-ni General Secretary Wilver Danggo-ni u•iatani gitade, West Garo Hills a•jani Deputy Commissioner Swapnil Tembe, Tura TV Tower sepango donggipa Diringgagre gittimo dongenggipa nokdangni manderangna a•rikgalani lekkako seataha.
“Skotong Minister Pa Conrad Sangma-ni ge•etaniko man•ne West Garo Hills a•jani Deputy Commissioner, Swapnil Tembe, Diringgagre gittimo songdongenggipa manderangko a•rikgalani chittiko seata. Uamangko a•rikgalani ortode ia jolo songdongenggipa manderang eleksin-ni somoio Bernard N.Marak-na kamrangko ka•aha aro chakpaaniko on•aha. Bernard Marak-ko rim•na skang, uni dongmiting somoio, gittimni manderangna maming a•rikgalani chittiko seata dongja, indiba jensalo Bernard Marak-ko dos galdrake rim•enba pattoko donatna ja•ku de•aha. Uamangna seatgipa chittio janapatani gitade, uamangko a•rikgalani ja•mano ua biapo Sainik Rest House-ko rikskagen ine janapataha. Uano dongenggipa manderang bilsi 30-na bate songdongengaha, ua manderang da•o batchi katgen? aro bano ma•chakgen? Ua biapo skang chengonin A•chikrang songdong a•chaenga, da•ode, ua manderangkon a•rikgalengaha. Ian Pa Conrad Sangma-ni jakpangpilani kamsa ong•a. Uni elekkao Bernard Marak-ko manderang namniktokbatengani gimin, ua an•tang re•baenggipa eleksino ama cha•na kenne, Bernard Marak-ni manderangko kal•ake roenga. Bernard Marak-ko ong•gija case-o ga•akataha aro manderangni mikrono Bernard Marak-ko galonna, indakgipa ja•kuko de•aha. Indake Bernard Marak-na chakgipa manderangko tol•e case-o ga•akate uano dongenggipa manderangko a•rikgalenga. Iani bidingo South Tura-ni manderang ma•sina ja•manchakja. Sixth Schedule-ni ning•o ga•akani gimin ua a•arang A•chikrangnisa ong•a. Ia obostani bidingo GHADC-ni EC-rang maming aganchakaniko on•jaha, maina uamang Conrad Sangma-na kam ka•giparang ong•a” ine Wilver Danggo matnangataha.
Pa Conrad Sangma, A•chikrangna Atchu Ambini donanggimin a•ao songdongenggipa manderangko a•rikgalaniara A•chikrangko chonnikani ong•a, uni gimin pilakan apsan ku•monge, uni kosako jegalskana nanga ineba BJP dilgipa janapataha.