Tura, June 12, 2022: A•chik Holistic Awakening Movement (AHAM), Meghalaya State Watershed Development Agency (MSWDA) Department-ni Field Engineer-na seokaniko jegalatenba, Field Engineer-na seokgiminko den•galpilchina sorkario dabiangaha.
AHAM-ni u•iatani gitade, MSDA department-ni Field Engineer-na Personal Interview-ko ra•ani ja•mano sak 16 manderangko kamo seokaha, indiba uarangoni A•chik saksa mangmangkosan seokaniara A•chik jatko chonnikani ba mikchepe ra•ani kam ong•a.
MSWDA department-ni Field Engineer-na seokaniko nike AHAM HQ, CGB-ni President George Prince Ch. Momin, a•dokni Skotong Minister Conrad Sangma-na lekka seate suk ong•gijaniko parakataha. MSWDA department, Field Engineer-na manderangko seokanio State Reservation Policy (SRP)-ko ja•rikja ine janapataha.
Ia project-ko chu•sokatna joltangni manderangkosa seokna nanga, uamangsa ku•siktangchi songni manderang baksa agan golporike kamrangko ka•na choligen.
“Chinga AHAM-ni dilgiparang aro gipin ka•rimskarang, MSWDA Department-ni Field Engineer-na seokgiminko den•galpile gital dake seoktaichina dabia. Gital seoktaianiko parakatanio State Reservation Policy (SRP)-ko ja•rikesa manderangko seokna nanga aro je mandean SRP-ni niamko jakkalgija manderangko seokahachim, uani bidingo sing•sandianiko dake badi ka•anggen. Ia dabianina sorkari mamingkoba ja•ku de•ja ong•ode, Katchari-ona ba Court-ona ra•doangskagen” ine George Prince Momin parakataha.