Tura, Sept 27, 2022:Kobor man•soani gitade, West Garo Hills a•jani A•kawe jolo donggipa Rajabala jolni Ramjong songni manderang re•anggipa Sonibar salo NGO-rangna badi ka•atani gimin dolgni NGO-rang Sombar salo re•ange sing•sandianiko dakaha.
Songni manderangni u•iatani gitade, Zikabari songni A•chik me•chik saksako gipin saksa ramao dongsoe kal•akna jotton ka•ahachim. Indiba ua me•chik rasong gnangbee gipin jatni jakoni joke katna man•aha.
Ia oboatani bidingo Phulbari-ni dolgni NGO-rang Niksamso Garo Community Organisation (NGCO) aro Federation Khasi Jaintia and Garo People (FKJGP) Rajabala Circle-ni dilgiparang re•ange sing•sandianiko dakahaon, ua me•chikni aganna gitade, “Anga pring 11 bajimango bajarchi PAN card ra•na re•angengachim, unon bangal saksa ramao dongsoe, rang•san angko gittoko rim•aha. Indiba anga ua bangal baksa dakgrike jenten jokna man•aha, ua somoio darangba ramao dongjani gimin angna dakchakgipa dongja” ine ua me•chik NGO-rangna agan talataha.
Gipin jatrang niam gri A•chik songrango napdrae songdongengani gimin A•kawe jolrango songsongenggipa manderangna aro A•chikrangna namen kenchakani ong•enga ine NGO-rang parakataha.
Indake ong•engon, niam gri napdrae district council-ni ning•o donggipa A•chik songrango songdongenggipa gipin jatrangko District Council niam gita nirok sandianiko dakenba champenganiko dakpachina NGO-rang GHADC-ni dilgiparangko mol•molataha.