AHAM, Ampati Civil Hospital-ni X-ray machine-ko tarie on•china Director-ko mol•mola

Tura, May 18, 2022: A•chik Holistic Awakening Movement (AHAM) South Western Zone Ampati, Meghalaya a•dokni Health Service Department-ni Director-na lekka sedoataha.

AHAM, SWZ-ni General Secretary Wester G.Sangma-ni janapatani gitade, South West Garo Hills a•jani Civil-Hospital-o donggipa X-Ray Machine-ko 2019 bilsioni da•alona kingkingba nosto ong•ani gimin galchipe donenga, iani a•sel bang•a manderang neng•nikanirangko man•enga.

“Bilsi 3-na kingking Ampati Civil Hospital-o X-ray machine nosto ong•e dongengani a•sel sanna banna re•bagipa bang•a manderang neng•nikaniko chagronga. X-ray machine nosto ong•e donganichi be•enni ning•o donggipa grengrango mai sabisiko man•enga uarangko u•ina gita man•jaenga. Indake saenggipa manderang tangka paisa bon•ne Tura Civil Hospital-ona re•bae X-ray ra•na nangenga. A•jani ning•o ga•akgipa bang•a songni manderang tanggitik a•sel ong•e, ga•ake mata bua man•gipa manderang Hospital-o ka•donge sanna re•bagenchimoba, X-ray machine dongjae uamangko Tura-ona watdoatna nangenga. Indake kangal cholgri manderang tangka paisarang chu•ongjae neng•nikani ong•enga. Ia obostani bidingo Health Department-ni Director baksa agangolpogrikanio ua ta•raken gital X-ray machine-ko Ampati Civil Hospital-ona sokatangen ine ku•rachakataha. Ampati Civil Hospital-o gital X-ray machine-ko tarie on•genchimode, a•jani manderangna bang•a dakchakani ong•gen” ine Wester Sangma janapatjolaha.