Tura, April 22, 2022:Garo Hills gimikni dingtang dingtang NGO-rang baksa nangrime New Tura Development Forum (NTDF)-ni General Secretary Pa LC Momin, Sukrobar salo a•dokni Skotong Minister Conrad Sangma-ni jak gita a•songni Home Minister Amit Shah-na lekka sedoataha.
“Meghalaya a•dokni skotong minister Conrad Sangma aro Assam a•dokni skotong Minister Himanta Biswa Sarma March jani 29 tariko Memorandum of Understanding (MoU)-ko Amit Shah-ni mikkango soi ka•enba Conrad Sangma a•dokni sima ari jolrango kajia golmalrangko namatna jotton ka•aha. Indiba uni chanchiani gita ong•jaha, Meghalaya a•dokni sima ari jolo donggipa aro pilak a•dokni manderang MoU-ko ra•chakna man•jawa ine jegalangtokaha.
MoU-ko soi ka•anio janapani gitade Meghalaya a•dokni bang•a songrang Assam a•dokona chapatako man•aha. Uni a•sel songdongenggipa manderang namen duk mikchi ong•e, ka•a be•ani ong•aha. Conrad Sangma-ni indakgipa kamara A•chik skako duk mikchiona sokatani ong•a.
Skotong Minister ua songrangona re•ange nichenggija aro sing•cheng sanchenggija a•arangko skatang Assam-na pakwataha. Pakwatako man•gipa a•arang gimikan KHADC-ni ning•o ga•aka, indiba uamango maming sing•chenga gri aro kobor on•a gri mittino srik srik kam ka•aniara kraani ong•chongmotja aro ra•chakna ma•ngipa ong•ja” ine memorandum-o janapataha.
Uni gimin pilak obostarangko nigrike aro u•ie ma•sie, MoU-ko nipiltaina nangchong•mota aro Conrad Sangma jinma baksa ku•mongesa pilak kamko ka•na nanga ineba janapatkuaha.