Tura, March 21, 2022: Garo Hills-ni bang•a Nokmarangni nangrimgimin dolsa Council of Nokma-rang March 17 tarik-o India a•songni Prime Minister Narendra Modi-na lekka sedoataha.
Uamangni seatgipa chittio janapatani gitade, “Sixth Schedule-ko taridapna miksongenganiko knae chinga Council of Nokmarang GHADC-ni MDC-rang ong•e jatna kamko ka•china jinmani seoke watatako man•giparangna Sixth Schedule-ni bidingo an•tangtangni nangnikaniko aro chanchianiko parakatpaenga.
MDC-rang ching baksa iani bidingo agan golpogrika dongja aro uamang chingni nangnikanirangko aro chanchianirangko Ministry of Home Affairs-ni office-ona aro Standing Committee of Parliament-onaba sokata dongja ine koborko man•aha” ine Council of Nokma-rang u•iataha.
Skanggipao, chinga GHADC-ni ning•o Village Council (VC)-ko ra•gatjachina 1958 bilsion sorkari lekkarangko sedoataha. Indiba Village Council an•ching A•chik jatni niam rettirangni kosako re•gipa ong•ani gimin, Village Council da•alona kingkingba eleksin-rangko ong•atna man•jaha aro Village Council lekkaosan dongaia, indiba kamrangko ka•ja aro ja•rikja. Uni gimin chinga Council of Nokmarang ia Village Council Act,1958-ko ra•galchina sorkariko mol•molna sika. GHADC, Assam sorkarini ning•o donge kamko ka•engmiting somoiosa ia Village Council Act-ko ra•gataha, uni gimin GHADC-o ia Act dongna kraja. Ia Act A•chik jatni niam retti-rangko nosto ka•aming apsan ong•a aro an•chingni songko nokko aro A•king Gore-ko nirokna dongipa Nokmarang maming bil dongjawaha.
Ia Act-ko da•alona kingkingba A•chik jatrang ja•rikkuja aro mikkangchiba ja•rikangjawa. Uni gimin, Village Council-ko ra•galgenchimode, nambatgen maina ia Act lekkaosan dongaia aro uko darangba ja•rikja ine Nokmarang janapataha.
Gnigipao, Sixth Schedule Bill, 2019 bilsio taridapgipa “Unrepresented Tribe” GHADC eleksino Garo Hills-o songdong a•chaenggipa darang mandekoba mikkang nitegija gimikon susana on•enga, indide ia “Unrepresented Tribe” ine sixth schedule-o seaniara kraani ong•ja. Uni gimin chinga Council of Nokmarang “Unrepresented Tribe”-ko ra•galchina sorkariko mol•mola, maina ia Amendment, A•chik jato ba GHADC-o Unrepresented Tribe dongna nangjawa ineba janapataha.
Gittamgipao sorkari Sixth Schedule Bill-ko taridapanio Governor, Garo Hills Autonomous District Council-ni sak 42 MDC-rangoniko sak 6 manderangko nominate ka•gen ine janapaha, jeon sak 2-de me•chik ong•na nanggen aro sak 4 de “Unrepresented Tribe”-oni ong•gen. Sorkarini “Unrepresented Tribe”-o me•chik sak 2 jattangko seokaniara jinma baksa apsangrik ong•ja maina gipin jatrangba Unrepresented Tribe ong•ja aro me•chik eleksino bak ra•na man•jawa ine beng•aba dongja. GHADC-o nominate ka•ako man•gipa sak 6 manderangna chu•onga gita chokkirang gnang aro uamangko mikkangchi manderangni seokako man•gipa MDC-rangnj niamrangko tarianio meligrikjae neng•nikanirangko ra•banaba gnang.
Uni gimin sorkari GHADC-na saksa memborkosan darangkoba mikkang nitegija nominate ka•e on•angchina mol•molataha.
Ia minggitam dabianirangko chinga nangnika aro chingni ku•rangko ma•mong sorkariona sokatchina chinga MDC-rangkoba mol•molata, indiba uamang chingni nangnikanirangko knachakja baksana dabiani ku•rangko a•songko dilgiparangni nachilona sokatenga ineba parakataha.