Tura, March 21, 2022: GSU Western Zone (North) Dadenggre-ni bipek GSU Phulbari Regional Unit-ni dilgiparang sal somoi bon•ahani gimin gital dilgiparangko seoktaina gita re•anggipa bilsini November 20 tariko tom•bimonganiko ong•ataha.
Indake ia tom•bimonganio Western Zone (North) Dadenggre-ni bipekrang jekai GSU Chibinang Unit, GSU Tikrikkila Unit, GSU Damal A•sim Unit, GSU Selsella Unit aro Rajabala Unit-ni dilgiparang, songni dilgiparang ma•gipa pagiparang, chadamberang aro Nokmarang bakko ra•angtokaha.
“Ia tom•bimonganio chinga Chief Elektion Commissioner aro Deputy Chief Elektion Commissioner-ko jinmani mikkango seokangaha. Chinga GSU Dadenggre Zone-ni ning•o donggipa pilak Unit-ni dilgiparang baksa je kamkoba donnua gri ka•enga aro je kamkoba nama aro namgijako ma•siesa ka•a. Chinga ia tom•bimonganiko ma•gipa pagiparang, chadamberang aro Nokmarangni mikkango ong•ataha. Darangba an•tangko Chief Eleksin Commissioner aro Deputy Chief Eleksin Commissioner ine a•kangja, uamangko jinmani namnikachi jinmani mikkangosa songa. Eleksin Commissioner dongjagenchimode, re•baenggipa sal somoirango sawa eleksinko ong•atgen. Uamang maidake basako an•tangko Western Zone (West) Raksamgre-ni Office Bearer ine u•iatna man•gnok. GSU Phulbari Regional Unit da•ona kingkingba Western Zone North Dadenggre-ni bipek ge•sa ong•a aro anga bebe ra•a iako ma•sina darangba gualchangja. Commission-ni dongimin niamrangko ja•rike je manderang dilgipa ong•e chokkio asongna sikaachim uamang mikkang changni eleksino susagrikchina aro A•chik jatni nanganina kamrangko ka•e ku•rangko on•china. Batanggimin salrango ia obostani bidingo Social Media-rango aro Songbad-rango niksogipa kattarangko darangba bebe ra•jachina, anga sakantikon mol•molna sika” ine Western Zone (North) Dadenggre-ni President Tengsan Marak didiataha.