Tura, Sept 19, 2022: A•chik chadambe saksa Tra Jakmatchi M.Sangma uni gisiko nangbee aro rakbee jotton ka•e, A•chik Ma•chongko ja•rikani aro gamchataniko sea-jotanio pangchake NEHU Shillong-oniko Master Degree of Philosophy (M.Phil) Garo-o Award-ko September 7 tariko man•ne A•chik jatna mikkim rasongko ra•baha. Ua Tura NEHU Campus-ni Garo Department-o Skie on•enggipa Dr Jacqueline R.Marak-ni nirok simsake jottonka•dilanichi ba skie on•anichi mingnamgipa bimingko man•ahanina, A•chik jatna namen katchabeani aro rasong chabeani ong•aha.
Ua Rongjeng Reserve-o donggipa Pa Daowling G.Momin aro Ma Jundilla M.Sangma-ni demechik ong•a. Ua da•o Tura Don Bosco Kolege-o Garo Department-ni Assistant Professor ong•e kamko ka•enga ineba u•iataha.