Tura, November 13, 2022: GHADC-ni CEM Albiniush Marak, Land Ownership Rights ba A•a nokgiparangna, Tura Reserve Gittim-o donggipa nokdang ge 100-na a•a pattarangko suale on•angaha.
Tura Reserve Gittimni manderang mittellpilani gita “Thanksgiving” Ceremony-ko ong•atangani salo Skotong Minister Conrad Sangma bakko ra•enba Reserve Gittim-ni nokdang ge100-na a•a patta-rangko suale on•angaha. Ia tom•anio West Garo Hills a•jani DC Swapnil Tembe, Tura Municipal Board-ni CEO Rikse R Marak aro gipin Department-ni Official-rang bakko ra•angaha.
Re•anggipa 2018 bilsini August 19 tariko gittimni manderang neng•nikarangko janape memorandum seenba Conrad Sangma-na on•ne, uamangni neng•nikaniko nirokatchina mol•molangaha.
Pa Conrad Sangma jinmana aganprakengon, Skotong Minister Conrad Sangma, “An•ching Tribal jatrang a•atang chigatangni nokgipa ong•a. Uni gimin a•a pattarangko a•ani nokgiparangna on•aniara chingni mongsonggipa kamrang ong•a. Chinga bilsi 4 ja 6-na kam ka•ani somoio, ia cholko ra•e, Reservegittim-ni manderangna dakchakaniko on•na jotton ka•aha. Chinga mikkangchi a•ani bidingo neng•nikaniko man•enggipa manderangna kangkare kae kamrangko ka•anggen ” ine aganangaha.
DC Swapnil Tembe tom•anio aganprakengon, “A•a patta-ko an•ching pilakan nangchongmota. Pilak application, Bank Application, Loan Application, Certificate Application, Land Document aro bang•a kamrangnan a•a patta-ko nangchongmota. Tura-o bang•a gittimrang gnang aro District Administration Revenue Branch, Enforcement Staff, DC Revenue Staff iani bidingo sing•sandianiko dakenga” ine aganangskaha.
Reservegittim-o neng•nikaniko man•enggipa obostarangni bidingo dingtang dingtang Department-rang jekai Chi, Bijoli aro uandakgipa Department-ni manderang gittimni manderang baksa bakrime kamrangko ka•anggen ineba ua agandapangaha.
A•a patta-ko man•gipa nokdangni manderango sing•aniko dakon uamang a•a patta-ko man•ne katchabeaha aro ia kamko chu•sokate on•anina dilgiparangko mittelangtokaha.