Williamnagar, November 13, 2022: East Garo Hills a•jani ning•o ga•akgipa Songsak Elakka-ni chadamberangna kal•susaanio nambata skianirangko on•na man•na gita Trinamool Congress (TMC)-ni dilgipa Dr Mukul Sangma, Football Coaching Camp-ko sal 14-na ong•atenga.
Ia sal 14-na ong•atenggipa Football Coaching Camp-ko Opposition dol aro TMC-ni dilgipa Dr Mukul Sangma, jinmana Sonibar salo oprake on•angaha.
Indake ia Football Coaching Camp-o FIFA-ni gita A-License-ko man•gipa, unbaksana English Premier League (EPL) South East Asia Coach Panel-ni Member ong•enggipa Arindam Deb, skianiko on•anggen. Ua bang•a Age Group-rangon robol kal•susaanio India a•songni palo kal•angaha. Arindam Deb changa sapanio ma•sigipa (experienced) ong•gipa sakbri Assistant Coach-rang dakchakanggen, uaranga Krishnendu Pal, Devdas Goswami, Ujjal Chakraborty aro Saheb Chattopadhyay ong•a.
Ia Camp-ko Songsak, Dagal Community Playground-o ong•atenga. Iano sak 70-80 chadamberang bakko ra•e robol kal•aniko skie ra•enga. Indake robol kal•aniko skie ra•enggipa manderang sak 140-150-ona salsa bate bate bang•rikrikani a•sel Dagal Community Playground-ni sepango donggipa Agitokgre Higher Secondary Skulni playground-oba apsan skie on•aniko ong•atanggen ine parakataha.
Chadamberangna robol kal•susaaniko skie on•asan ong•aigija, Songsak Elakkani chona dal•a pilak Football Club-ni Coach-rangna November 13 tariko Classroom Session-ko ong•atanggen jekon Dr. Mukul Sangma an•tangni noktango ong•atna kusi ong•e rimchaksoenga.