Chang 46-gipa Dama Bol 100-ko doke wangalani tom•tome aro nambee matchotanga  

0

Tura, Nov 13, 2022:Ia bilsio Salgittamna ong•atanggipa chang 46-gipa Hundred Drums Wangala Festival ba Dama Bol 100-ko doke Wangalani Sonibar salo tom•tome aro nambee matchotangaha.

Ia Wangalani bon•kamgipa salo a•dokni Skotong Minister, Pa Conrad K.Sangma bakko ra•angaha. Unbaksa gipin dilgiparanga a•dokni Deputy Speaker Pa Timothy D.Shira, PHE Minister Bantedor Lyngdoh Thongkar, Bajengdoba-ni MLA Pongseng R.Marak, Assam a•dokni Deputy Speaker Dr Numal Momin, North Tura-ni MLA Thomas A.Sangma, West Garo Hills a•jani Deputy Commissioner Swapnil Tembe, Western Range-ni DIG, TMB-ni CEO Ma Rikse R.Marak, Hundred Drums Wangala Festival Committee-ni dilgiparang aro dingtang dingtang Sorkari Official-rang dongpae bakko ra•angaha.

Pa Conrad Sangma salni dal•batgipa sokgipa ong•e, jinmana aganprakengon, iandakgipa A•chik jatni gamchatgipa dakbewal rikbewalrangko ripingna rakbee kam ka•gipa Hundred Drums Wangala Festival Committee (HDWFC)-ko de•mittele aganangaha.

Skotong Minister Wangala Festival-ni bidingo jinmana talatangengon, ian A•chik jatni dingtangmanchagipa dakbewal rikbewal ong•a aro iako mikkangchi nambate ripingangkuchina didiangaha. “An•chingara sawachim, iako mesokna maniani ong•a. Iako maniachi an•chingara sawa aro maidakgipa jat ong•achim, uko mesokani ong•a” ine Pa Sangma aganangaha.

Ia jatni gamchatgipa ku•sikrangni gimin aganengon, Garo aro Khasi ku•sikrangko Indian Constitution-ni 8-gipa Schedule-o napatna gita a•dok sorkari Assembly-o Resolution-ko ra•aha ineba Pa Sangma aganangaha.

“Anga da•alo ia festival-na gong kror 2-ni sanction letter-ko Meghalaya Age Ltd-oniko on•angenga. Iako Tourism Department-ni gita jakkalenba Wangala Festival-ko Wangala A•dam-o Garo Haritage Village-na pilak dakbewal rikbewalni kamrangko ka•anggen” ine parakangaha.

Ia Wangalani somoio Assam Legislative Assembly-ni Deputy Speaker Dr Numal Momin-ba dongpae Wangalao sokbagipa manderangna nama sikaniko on•nangaha.

Inadake, wangalaona sokbagipa manderangko HDWFC-ni Chairman Pa Ronald Rikman Ch.Sangma, rimchaksoani kattarangko jinmana aganengon, ia gitalgipa nokkap Wangala A•dam-o re•anggipa 2020 bilsini November 12 tarik dipetsa Wangalaniko ong•atchengaha, da•o bilsi gittamsan ong•kuenga, uni gimin chu•onga gita tarisoanirangko daksona man•jaha. Indiba ian gisik ra•beani sal ong•a ine aganangaha.

Ia Wangala-o Millickson K.Sangma-ni see donanggimin mingsinggipa, Wangala Anthem, “Dimdim Dimchong Dachichong” ko Wangala Festivalo ring•e, sakanti sokbagiparangko rimchaksoaha.

Indake, ia Wangala-ona dingtang dingtang a•songrang jekai France, Gujarat, Bengalore, Karela, Assam, Sikim a•dokrangoni sokbatokaha aro dingtang dingtang chel•begipa biaprangoni songbad segiparang aro youtuber-rangba A•chik jatni dal•begipa Wangala Festival-ona re•batokaha.

Ia Wangalanio bakko ra•gipa dol 10 chroksusagiparang, West Garo Hills a•jani Dura Kangkanggre, Gondenggre, Sadolbra, Dalbenggre, Chidaogre, Chibragre, North Garo Hills a•jaoni Wa•nokdamgre, East Garo Hills a•jaoni Rapdikgre aro South West Garo Hills a•jaoni Chepagre aro Bangkapara. South Garo Hills a•jaoni mangmangsan Wangalao ra•angjaha.

Indake ia bilsini Wangalao chroksusagiparangoni Sadolbra chegipa ong•aha. Re•anggipa bilsio cheanggipa Gondenggre, ia bilsio gnigipa ong•rikaiaha aro Chidaogre gittam biapko man•rikskaha. Uni gisepon Chibragre chrokgipa dol, best dicipline ine seokako man•angskaha.

Skotong Minister Conrad Sangma kror 2-ni Sanction Letter baksa lak 25 chamgipaoni lak 10-ni cheque-ko HDWFC-ni Chairman-na pakwatangaha.

Leave A Reply

Your email address will not be published.