Tura, Jan 17, 2023: Meghalaya Pradesh Congress Committee (MPCC) aro Meghalaya Pradesh Youth Congress (MPYC)-ni gisepo bang•a meligrikgijanirang ong•enga ine PMYC-ni General Secretary Roberth K Sangma aro Vice President Pangcheng Sangma Sonibar salo kobor ra•timgiparangna aganaha.
MPYC dilgiparangni parakatani gitade, Congress Party-o kam ka•engon, chadamberangni agananiko, kosak gadangni party dilgiparang aro AICC-ni dilgiparang knachakja aro maming ku•mongani dongja, an•tangtangni namnika gita party ticket-rangko on•enga. Party ticket-ko on•na skang grass-root levelo kam ka•giparang baksa ku•mongesa candidate-rangna party ticket-ko on•na nanga.
MPCC-ni dilgiparang, MPYC dilgiparang baksa maming ku•monggrika dongja, an•tangtangni sika gita party ticket-ko on•enga ineba janapataha.
Chadamberang party-o kam ka•engon, party-na jakkaltogipa mandena aro ru•uta bilsina party-o dongkame dagdike on•enggipa dilgiparangna party ticket-ko on•rongja.
Indake ong•engon, da•o Garo Hills-o dam 10 aro Khasi Hills-o dam 10 elakkarango party ticket on•kuja. Uni gisepon Congress party-o napgitalrangna ticket-ko ong•genchimode, Youth Congress, MPCC dilgiparangni kosakko raka ja•kuko de•anggen, maina gital manderang party-o ticket-na mangmang napgitike ticket-ko bi•enga. Uni gimin party-o gital napgiparangna ticket on•genchimode, kraani ong•ja ine MPYC dilgiparang suk ong•gijaniko parakataha.
Mongsongbate South Tura elakkao Pa Laben Ch.Marak-na party-ni ka•rimska ticket on•aniko nangnika, unbaksana social media-rango uni bimingko parakatmanaha, uni gimin Laben Marak-na ticket on•genchimode, nambatgen, indiba on•jagenchomode, party-ni kosako re•gen ine MPYC-ni General Secretary Robert K Sangma parakataha.