Tura, Feb 26, 2023: Party-ko galchipgipa aro dal•batgiparangni aganako knachakgijagipa MLA aro MDC-rangko maming saloba party ra•chakna man•jawa ine NPP-ni Padot Conrad K Sangma Sukrobar salo aganaha.
Conrad Sangma Sukrobar salo Raksamgre elakkani NPP candidate Limison D Sangma-na campaign ka•ani salo ia kattangko aganaha.
Uandakgipa candidate-rang B-Mahal-ni obostako aganne roenga, indiba ua kattarang kakket ong•ja aro sorkari B-Mahal-ni a•ako maming saloba pala dongja ine aganangaha.
“Chinga manderangko a•rikna maming miksongani dongja, indiba chinga B-Mahal-o songdonggipa manderangna namgniko ra•banasa kamrangko ka•enga” ne Conrad Sangma aganangkuaha.
District Council-ni neng•nikanirangko council-ni memborrang baksa agangrike namatna jotton ka•ahaon, “Ua somoio na•simangni MLA gitcham Benedict Marak, chingko aro gipin MDC-rangni aganako knachakjaha. Ua an•tangni sika gita adita niamrangko ra•gate, B-Mahal-ni mitam a•arangko ra•na jotton ka•aha. Iako anga u•iahaon, anga ra•chakna man•jaha” ineba aganaha.
Ia biapo songdonggipa manderang uko bilsi 5 MLA bilsi 10 MDC seokaha, uandaken MDC-rang uko CEM ong•atahachim, indiba adita somoini ja•mano ua an•tangni sika gita dakaha.
Da•o ua biapo manderang tom•tome janggi tangenga.
“Chinga sasono re•bana skang, adita manderang tangka dabiani lekkatrangko man•rongachim, indiba re•anggipa bilsi 5-ni gisepo Garo Hills-o aro a•doko indakgipa kamrang dongjaha. A•dok namen tom•tomenga,” ineba Conrad Sangma agandapangaha.