Tura-ni MDC a•a be•dape aro chi ripe duko ga•akenggipa manderangna dakchaka
Tura, June 25, 2022: Re•anggipa June 16 aro 17 tarikrango dondikgija mikkarang jimbee waanichi Tura songjinmani wilwilao donggipa bang•a gittimrangon nok jamrango a•arang be•dape nosto ong•anichi duko ga•akenggipa manderangnaba aro nokrango chi ripe nosto ong•gipa nokdangrangna Tura-ni MDC Bernard N.Marak, June 25 tarik Sonibar salo mirongrangko ra•ange nokprakna bagprak (kg 50) ka•e suale on•angaha.
Tura-ni wilwilao donggipa bang•a gittimrangon a•arang be•dapako man•gipa aro nokrango chi ripe nosto ong•ako man•gipa gittimrang, mongsongbate Ringre chisam jolo dongenggipa Chinap A•silang gittimrango neng•nikaniko man•ne dongengachim. Ua neng•nikaniko man•enggipa nokdang ge 30-rangna Tura-ni MDC mirongrangko ra•ange on•eaha.
Mikkangchiba indake duko ga•akenggipa manderangna dakchakanirangko on•angkugen ineba Tura-ni MDC parakataha.