Tura, May 23, 2022: Meghalaya a•dokni BJP President, Ernest Mawrie-ni CBI Enquiry-na dabianiko chakpae, Tura elekka-ni MDC Bernard N. Marak a•dokni Skotong Minister Conrad Sangma-ko CBI-chi sandiani (enquiry)-ko ra•bachina ong•jaode, kamtangko watchina dabiangaha.
“Chinga BJP-ni dilgiparang, Conrad Sangma-ni Skotong Minister ong•e chokkio asongani ja•mano a•dokna aro jatna nama sikaniko dangdike on•gen ine ka•dongachim. Indiba ua a•dok gimikni ka•donganiko pe•aha. Kangal cholgri apsan biapon dongpilna nanganaha unbaksana bang•a chadamberang kamgri rona nangaona sokaha. Ua an•tangni NPP dolko jinmani tangkako cha•minoke dal•dapatnasa kam ka•aha. Ua a•dokona CBI enquiry-ko ra•bana ong•jaode, kamtangoni ong•katna nanga. Conrad Sangma-ko Skotong Minister songaniara a•songna aro jatna namgni ong•gen ine BJP dolni ka•dongsoaniara, indinsa ong•gramaiaha. Ma•mong sorkariko rikenggipa BJP dolni bang•a Scheme-rangkon ua an•tangni namgninasa jakkalaha. Conrad Sangma an•tangni kamrangko nipiltaie jinmani namgnina kamtangoni an•tangan ong•katna nanga. Ma•mong sorkarini dilgiparang Meghalaya a•dokona re•baenba uamangni on•atenggipa scheme-rangko a•doko name kam ka•ama ka•jaenga uko sing•sandina nanga. Ma•mong sorkariko rikenggipa BJP dol Meghalaya a•dokna bang•a scheme-rangko on•ataha, indiba ua Scheme-rangko Conrad Sangma-ni Contractor-rang aro Business Partner-rang an•tangtangni namgnina jakkale a•dokni manderangko a•gisi gita gran pilataha. Conrad Sangma-ni ong•gija ramako re•dile sason ka•anio BJP maming saloba a•dokko groni wario sripatna on•jawa. Bye-Eleksin-ni somoio BJP dol una chakpaaha, indiba ua an•tangni ku•mitchetatangkon gualaha” ine Bernard Marak matnangataha.
Ma•mong sorkari BJP dolni dakchakachisa Meghalaya a•doko MDA sorkariko NPP dol rikenga. BJP dolni dilgiparangna koila aro bijolini bidingo talataniko on•na nangchongmota ong•jaode, NPP dol baksa bakrime kam ka•aniko bon•chongdikatgen.
“Chinga NPP dol baksa bakrime kam ka•aniko bon•chongdikatna ma•mong sorkarini Green Signal-kosan sengaiengaha. Koila aro bijolini bidingo CBI enquiry-ko dakna nangchongmota. NPP dolni donnue kam ka•gipa agenda-ni a•selo Meghalaya a•dok kangalsa ong•rikrikengaha. NPP a•dokni tangkako jakkalsrete North East a•ja gimiko NPP dolko gipatnasa kamko ka•skaenga. Ua chokkitangoni an•tangan ong•gonna nanga. Bang•a changon ua sing•anirangna aganchakani dongjae gipin kattako pa•sike katronga. Chinga BJP dolni manderang uni namgijagipa kamko jinmana parakna aro uko kamtangoni wate on•china a•dok gimiko campaign-ko ong•atanggen” ineba Bernard Marak parakataha.
MDA sorkariko rikna nama re•dilaniko ra•bapilna Conrad Sangma-ko kamoni a•rikgalna gita nanggen. Minister-rangko bilsi 2 ja 6 ja•man boldolpilna man•genchimode, Skotong Minister-koba bodolna gita man•aigen. Meghalaya a•dokna nama dilgipakosa nanga, Conrad Sangma gita an•tangni namgnina a•dokni manderangko kangal ong•atgipa mandeko nangja. Conrad Sangma CBI enquiry-ko ra•chakna je•chakgenchimode, ua kamtangoni an•tangan ong•katna nangchongmotgen ineba ua agandapataha.