Tura, May 14, 2022:West Garo Hills-o mikka balwa rakani a•sel bang•a bol wa•arang ramarango be•dapaha.
Indake ong•engon, Sonibar attam walsimsimo Chasinggre ISBT rama pekwatgipaoni ong•ongipa ramao bol be•dapani a•sel bang•a garirang re•na man•jae bol den•ako riting riting dake sengna nangpilaha.
Indake ramao bol be•dape dongengako manderang den•pee galmitting somoio Konstan Sungoh ni bimungo register kagipa Jeep gari bolsa ML05B-5162 ta•rakprete salbaenba ramao kam ka•enggipa manderangko salpakeaha aro bike bolsakoba nangataha.Ua ta•rakprete gari salbaenba manderangko saknaatani gimin manderang uko garioni salongkatna jotton ka•oba ua garioni ong•katjaha, batesa manderangni janggina simsakgija an•tangnasan chanchie, manderangni bol den•peako sengnapgija salprete katangaha ine kobor man•aha.