Tura, April 12, 2022: Poraia matchote kam man•gija roenggipa chadamberang neng•nikaniko bang•a changon chagronga. Centre Scheme-ko jerangan poraia matchote kam gri roenggipa chadamberangna tangka paisarangko dakchakani scheme ong•achim, ia scheme da•ona kingkingba chadamberangna jumang gitasan ong•aia maina bank-ni manderang uamangna maming dakchakaniko on•ja.
A•songni Prime Minister Narendra Modi poraia matchote roengggipa chadamberangna bang•a Scheme-rangko on•atenga, indiba bank-ni manderang chadamberangna dakchakaniko on•a jechakaniara Narendra Modi-ni niksamsoaniko be•gruata gita ong•a. Bank-ni manderang chdamberangni loan ra•na dorgasto on•giparangko pangnan jechakronga, maina uamang chadamberango sorkarini kam dongjana ka•dongani gri ine chanchie application-ko ra•chakrongja.
Mitam Bankrang jaantinj dormaharangko bi•a, mitamrang Work Experience-ko bi•a iarangko mesokna man•jagenchimode uamang application-kon ra•chakja. Je chadamberangnan ia scheme-ko Narendra Modi on•atahachim, uamang bang•a changon cha•bokako man•a. Narendra Modi-ni niksamsoaniara kam man•gija roenggipa chadamberangna ja•atango chadengna tangka paisarangko scheme on•ne dakchakanian ong•achim. Chadamberangan mikkangchi a•doktangko rikangnagipa ong•a, uni gimin chinga BJP dolni manderang chadamberangni re•baenggipa salrangna ja•atango chadengna man•a gita dakchakaniko on•anggen ine Tura elekka-ni MDC Bernard Marak parakataha.
Narendra Modi Self Reliant India-ko chadamberangna miksonge bikotaha, aro BJP dol ta•raken ia scheme-ni bidingo manderangna agantalate on•anggen. Bang•a changon chadamberang Industry Office, KHADI aro MSME Department-rangni seokatako man•genchimoba banko uamangko kam dongjani gimin ra•chakja. Indakgipa obostarangko bon•chongdikatna BJP dol ta•raken Self Reliant Camp-rangko ong•atanggen ineba MDC parakataha.