Ma•sina man•gijagipa manderang baksa pulisrangni gogrikanio mande saksa guli nange sia

0

Tura, April 12, 2022: Ma•sina man•gijagipa manderang baksa pulisrangni gogrikanio saksa mande guli nange siaha ine koborko man•aha.
Koborni gitade, ia obosta April 11 tarik pring 7:30 bajimango Dadenggre Pulis Station-ni ning•o donggipa Magalpara songo gogrikani ong•aha. U•ina man•gijagipa manderang pulisrangni am•sandina re•rangmiting somoio slai goe chadrapsoaha ine u•iataha.

Pulisni parakatani gitade, ma•sina man•gijagipa manderang Chibinang aro Phulbari songrangoniko gue ra•na re•baenggipa manderangko rim•sruke ra•angna miksonge dongengko kobor man•soe, pulisrang uamangko rim•na gita sandiangaha. Pulisrang April 10 tarik pring 1:30 bajimango koborko man•soani bakan garirangoniko sandina a•bachengaha.

“Patrolling dolrang ramarango re•roroe sandian baksana Mobile patrollingko darangnaba u•iatgija rang•gitik Sellsella gita re•ange Tura-oni Phulbari-ona aro Phulbari-oni Tura-ona Dadenggre gita re•bapile sandianirangko dakaha. Chingni pulis dolrang Chibinang-oni Dadenggre-ona patrolling ka•miting somoio ma•sina man•gijagipa manderang sakgittam ba sakbonga silchi dare ra•bite chingni pulis dolko chadrapsoaha. Ia obosta Malchapara songni gital RCC dollong rikgipa sepango ong•aha. Ua manderangni pulisrangko chadrapsoani a•sel pulis gypsy garini headlight nosto ong•aha aro jakasini chakka bretaha. Pulisrang janggitangko jokatna uamangko warachakna silchi darerangko jakkalaha. Uamang minute 5-na kingking dolgnian gogrikaha. Indake obosta ong•ani bakan chinga District Magistrate aro Department-ni Officer-rangna koborko on•ataha” ine a•sel ong•ao dongpae sa•dika man•gipa Tura-ni SP Vivekanand Singh-na aganaha.

Magistrate-ni sokbaa ja•mano gogrikgipa biapko sandie nion me•asa saksani guli nange sigipa manggisiko nikaha. Unbaksana pulisrang AK ge•sa aro magazine, 7.62 slai guli rong 34, 7.62 cartridge rong 45, 9mm cartridge rong 22, Electronic Detonator-rang, ge 3, Gelatine go•olrang ge 4-ko man•aha. Indake kamrang matchotani ja•mano sigimin mandeni manggisiko Tura Civil Hospital-o post mortem ka•na watataha ine SP u•iataha.

Ia obostani bidingo Dadenggre Pulis Station-o case No. 02 (04) 2022 U/S 120B/121/121A/307/353 IPC r/w 25 (1A)/27 Arms Act-o mamlako segataha ineba parakataha.

Leave A Reply

Your email address will not be published.