BJP dilgiparangko pulisrang ong•gija neng•nikatani gimin jegale GH, BJP asonge jingjengata 

Tura, July 31,2022:Garo Hills BJP membor-rang Sonibar salo Tura BJP Office-o asonge jingjengatangaha. Garo Hills BJP, West Garo Hills a•jani Deputy Commissioner office mikkango jingjengatna on•jani gimin BJP Office mikkang Tura-o jinma tom•dake jingjengatangskaha.

Garo Hills BJP dilgiparang aro BJP dolna chakpagipa membor-rang uamangni dilgipa aro Tura-ni MDC Bernard N.Marak-ko Tura SP ka•saninggija duk on•ne kal•ake roenga aro District BJP dilgiparangko statement ra•na changni chang okgamate statement ra•gija kal•ake ba neng•ate roengani gimin jegale, Bernard Marak-na chel•chakaniko on•china dabie DC office mikkangona jinma re•jomaniko dakna miksonganiko DC permisaion on•jani gimin office-tango asonge jingjengatskaha ine District BJP President Daulat C.Marak kobor ra•timgiparangna aganaha.

Tura pulis Bernard Marak-ni kosako minggittam mamlarangko segatani ja•mano sal 8-na pulis custody-o doataha. Re•anggipa July 22 attamo pulisrang Rimpu Bagan-ko chadrapani ja•mano uni farm house-ko ong•gija kamrangna jakkala baksana gopretgipa bosturangko man•ani gimin aro bilsi sokkugijagipa bi•sa saksako farm house-o chipchange donenga ine mamlarangko segataha.

Tura SP Vivekananda Singh Rathore aro DC Swapnil Tembe-ni ong•gijagipa kamrangko jegale Garo Hills BJP dol jegale Tura SP aro DC-ko kam ra•jitangchina dabie jingjengataniko dakangaha.

Indake ong•engon, a•dokni BJP Vice President aro Tura MDC Bernard N.Marak-ko pulisrang rim•ani gimin Meghalaya BJP incharge Chuba Ao Bernard Marak-na warachake sorkarisa Bernard Marak-ko ong•gija mamlarango tol•e rim•aha aro am•sandianiko dakenga ine matnangataha. Uandake Meghalaya BJP President Ernest Mawrie-ba Marak-na chakpaaniko parakataha.