Shillong, June 26, 2022: Cabinet Minister Shanbor Shullai, BJP darangkoba mikkang nigija, jat basegija kangal cholgri pilakkon dal•gipa chugipa ong•na cholko on•a ine parakataha.
“Rajastan a•dokni gitcham Governor Droupadi Murmu-ko President-ni Candidate ong•e susana cholko on•na nanga. Murmu saksa Tribal Candidate ong•a aro ua saksa kangal cholgri nokdangoni ong•achim, Narendra Modi darang mandekoba mikkang nitegija pilaknan cholko on•ronga” ine janspataha.
Minister of State for Minority Affairs, John Barla, West Bengal a•jani saksa kangalbegipa nokdangoni ong•a. Barla jat, torom, kangal ong•a ba man•ne cha•ako mikkang nigija, BJP dol una Party Ticket on•aha aro ua saksa Kristian ong•e, Hindu bang•gipa a•jao cheaha.
India a•songni Prime Minister Narendra Modi-ba kangalbegipa nokdangoni ong•a, BJP dol uko Gujarat a•dokni Skotong Minister ong•ataha, uni jam•ano India a•songni Prime Minister ong•aha. Prime Minister Narendra Modi, Pope Francis-ko India a•songona re•bachina okamataha, ua darangkoba mikkang nigija jinmani namgnina kamrangko ka•aha.
“Anga an•tangba kangalbegipa nokdangonisa ong•a, angni Congress dolo ong•mitingo anga bang•a neng•nikarangko chagronga. Anga New Delhi-chi re•ange dilgiparangko gongena chol ong•ja, indiba da•o BJP dolo ong•e anga maming jajrengani gri dilgiparangko re•ange grongena cholko man•enga” ine ua janapaha.