Baghmara, June 26, 2022:Adita salrangna skang dondikgija mikka waani a•sel South Garo Hills a•jani Siju-o bang•a nok jamrang nosto ong•aha. Indake sak hajalni hajal manderang nokgri jamgri ong•tokaha.
South Garo Hills a•jani ning•o ga•akgipa songrang jekai Siju, Moheshkola aro uni wilwilao donggipa songrang bang•bate nosto ong•ako man•aha. Siju-ni duko gaakengako nike, A•chik Heritage Pursuit (AHP) relief operation-ko ong•ate bil amadipet uamangna kamko ka•e dakchakanirangko on•angaha. Uamang Social Media, Facebook aro WhatsApp-rang gita jinma apsan melie dakchakaniko on•pana ku•mongangaha. Ia Relief Operation-ko ong•atio Dobasipara Baptist Church, A•dinggre Prayer Cell, Tura Baptist Church, Chimik Women’s Grouprang jaksrambee on•gilataha ineba u•iataha.
AHP-ni u•iatani gitade, konta 24-ni gisepo tangka gong hajar sotchet-chet ritchabonga (Rs- 88,500)-ko man•aha. Indake uamangni man•sogipa tangkarangchi nangani bosturangko bree gitchaenggipa gong hajar kolatchisa (Rs-31,000) tangkarangko uamangni nanganina jakkalaha ine songni manderangna pakwate on•skaha.
Rongram Block-ni teamrang aro bang•a manderang uamangna nangani bosturangko suale on•ani somoio re•ange dakchakaniko on•epaaha ine parakataha.