Bina Rosalinne A Sangma JD (U) dolni candidate ong•e North-Tura elakkao susaanggen

Williamnagar, November 15, 2022: Meghalaya Janata Dal United JD (U)-ni Convenor, Robinus T. Sangma, National Secretary Sanchumo Lotha aro dolni bang•a dilgiparang Tura Rikman Complex-o tom•aniko ong•ate, Ma Bina Rosalinne A. Sangma-ko JD (U) dolona rimnapaha ine u•iataha.

Indake re•baenggipa 2023 bilsini election-o Ma Bina Rosaline A. Sangma North Tura elakkao JD (U) dolni candidate ong•e susaanggen ine parakataha.

Tom•anio jinmana aganprakengon, Bina Rosalinne Sangma, “Anga A•chik jatni dakbewal rikbewalni gimaanganiko nike namen duk ong•a. Re•baenggipa 2023 bilsini eleksino angna manderang cholko on•genchimode, anga a•jani manderangna aro chadamberangna bimchipe kamko ka•anggen” ine agangaha.

JD (U) bimchipe kamko ka•enba eleksin-na candidate-rangko seokenga. Uamang a•dokni dam 60 elakka-rango candidate-rangko seoke dolni gita susaatgen ineba u•iataha.

“JD(U) dolni ticketko man•na a•dokni kona noksik gimikonin manderang re•bae mol•molaniko dakenga. Indiba chinga manderangko aro uamangni kamrangko name chekesa candidate-ko seokenga. Gipin dolni candidate-rangba JD (U) dolo nape eleksino susaangsana mol•moltokenga, chinga uamangna ticket-rangko on•na ku•rachakaha. Uamangni dolona chu•gimik napani ja•mansa bimingrangko parakanggen. Uasan ong•aigija je manderangan jatna a•dokna minge kamko ka•na kangkare kaenba ticketko bi•na re•bagenchimode, chinga JD (U) dolnj ticket-ko on•na jechakjawa” ine Robinus T Sangma janapataha.