Shillong, November 15, 2022: Chang 2-gipa North East Olympic Games-o Meghalaya a•dok skanggipa Sonibar salo gold medal-ko man•aha.
Malki buringo ong•atgipa MTB Downhill Hardtail Mens’ Race-o a•dokni Willbornson Wahlang chegipa ong•enba Gold Medal-ko ra•baaha.
Ia mingsa kal•susaanio Meghalaya a•dokni gimik category-on chegipa ong•aha. A•dokni saksa Therlang Marbaniang, Silver Medal-ko man•aha aro Nicholas Syrti Bronze Medal-ko man•aha. Wahlang minute 2-ni gisepon matchotatna man•aha, uandake Therlang minute 2 second 24 aro Nicholas minute 2 second 25-o matchotatna man•aha.
Uasan ong•aigija, MTB Downhill Full Suspension Men’s Race-o Manipur-ni saksa Thokchom Tennyson Singh-ba minute 2 second 8-o matchotatna man•ne Gold Medal-ko man•aha. Unbaksana Meghalaya a•dokni Wanki Ha-o Siam minute 2 second 15-o matchotna man•ne gnigipa ong•aha, Manipur-ni Cyclist Kshetrimayum Jack Singh minute 2 second 19-o matchotatna man•enba gittamgipa ong•angskaha.
Women’s Open Cross Country Race-o, Arunachal Pradesh-ni Lindum Iakia minute 9 second 42-o matchotna man•ne skanggipa ong•aha, Manipur-ni Pangambam Priya Devi minute 9 second 43-o matchote gnigipa ong•aha. Unbaksana Haobam Urvashi Devi minute 9 second 48-o matchotenba gittamgipa ong•skaha.
Sukrobar salo ong•atanggipa Junior Competition-o, Manipur-ni AZ Thotmachan gold medal-ko man•angaha, Meghalaya a•dokni Pynshaillang Khylait gnigipa ong•e Silver Medal-ko man•skaha. Uandake Mizoram-ni Vanlalruata gittamgipa ong•e Bronze medal-ko man•aha.
Elite Men’s Cross Country-o, Manipur-ni Khundrakpram Ronel Singh skanggipa ong•e gold medal-ko man•aha, A•dokni John Kevin Khylait gnigipa ong•e Silver Medal-ko man•aha aro Mizoram-ni Mesak Vanlalvena gittamgipa ong•e Bronze Medal-ko man•skaha.
Janapatgimin kal•susaanirango chegiparangna Dr. Ampareen Lyngdoh-ni jakchi boksisrangko on•angaha. Ia tom•aniona NEOG, 2022-ni Additional CEO aro Secretary Cyril VD Diengdoh dongpae bakko ra•angaha.
Indake Cycle salsusagiparangna salgni neng•takenba uamang Monggolbar salo Shillong-oni Mawthadraishan-ona km 80-ko salsusaanggen ineba parakataha.