Bilsisa jadokni me•chik bi•sako surgery ka•anio chu•sokanina ma•gipa pagipa kusi ong•aniko parakata   

Tura, Oct 17, 2022: Tura Pulis Station-o constable ka•enggipa Arphon D.Marak aro Marinia R.Marak-ni demechik bilsisa jadoksan ong•kuenggipa Chuesa Amora R.Marak atchikaonin ka•tongni sabisiko man•engani gimin pangnan jajrengkame dongengachim.

Koborna u•iatani gitade, ua bi•sani jaksirang, jakskilrang aro ku•chilrang tangsimachim. Uni gimin ma•gipa pagipa kenbea gnang, uko Tura Civil Hospital-o porikka ra•e nina gita rimangaha. Indake uko porikka ra•e nion ua bi•sa atchikapaoni ka•tongo saani donga ine nike nambata sannaniko dakna Shillong-ona rimangchina aganaha. Shillong-ni doctor-rang ua bi•sani ka•tongko ratna gita aganaha, indiba uni ma•gipa pagipa namen duk man•ne kenahani gimin bi•sani ka•tongko ratjaha.

Indake Paediatric Cardiac Society of India (PCSI)-ni sandie niani gitade, India a•songo bilsiprako sak 2,00,000 bi•sarang ka•tong saaniko atchikapaonin man•enga ine nikna gita man•aha. Iarangoni, bak bongaoni baksade bilonge saanirangko man•a donga, uni gimin bi•sako atchiani bilsio name simsakaniko nanggen ine parakataha.

“Bi•sarangna nama an•seng-baljokani cholrangko bang•a a•selrangchi sokatna gita man•ja, jekai u•i-ma•sianio komiani, ma•a-paarangni chanchiani bewalrang, aro kangal cha•asiani”, ine National Health Mission (NHM)-ni Director Ramkumar S parakaha.

Indaken bilsigni ong•ahaoba Chuesa Amora R Marak rama re•na man•kujani gimin uni ma•gipa pagipa Tura Maternity and Child Hospital (MCH)-ona rimangaha, jeon uko Rashtriya Bal Swasthiya Kaaryakramni (RBSK)-ni ning•o donggipa District Early intervention Centre (DEIC)-ona dingtangmancha sannaniko dakgipa (specialist)-ona rimangchina aganaha.

A•dokni skotong minister Conrad K Sangma aro health minister James Sangma-ni dilanichi Meghalaya sorkari CHD-ko warachakna dingtang dingtang cholrangko bikotaha.

CHD-na dingtangmancha sana-bananiko dakna nangchongmota ine u•iani ja•mano, RBSK scheme-ni ning•o DEIC-ni gita Meghalaya a•dokni pilak sagipa bi•sarangna sana-bananiko aro simsakanirangko dakna MoU-rangko Apollo Chennai, Apollo Guwahati aro Amrita Institute of Medical Sciences (AIMS) hospital-rang baksa soi ka•aha. Ia MoU-rangko RBSK, National Health Mission (NHM), Meghalaya aro Apollo Enterprise 2022 bilsini May jao Ramkumar S, IAS, Additional Secretary to Directorate of Health & Family Welfare aro Mission Director, National Health Missionni (NHM)-ni mikkango soi ka•grikaha aro AIMS baksa July 2022-o soi ka•skaaha ine u•iataha.

Chuesa Mark-ni pagipa Arphon D Marak aro ma•gipa Marinia R Marak-ni kenanirangko u•ie DEIC-ni doctor-rang aro social worker-rangna Chuesa-ko ta•rake sana-bananiko dakna nangchongmotani gimin agan-ku•pattie on•ataha. Indake “Uano kam ka•giparang sana-bananirangko dakani gimin chingna agan talate on•aha aro je somoioba chingna kenani aro jajrenganirangko phone ka•e aganatronga,” ine bi•sani pagipa parakataha.

Re•anggipa bilsio DEIC-ni gita Garo Hills gimiko sak 1,78,000 bi•sarangko porikka ra•e nina man•aha. Bilonge sagijagipa bi•sarangko Civil Hospital-ona ra•ange sananiko dakna gita watataha aro CHD, Corneal Opacity ba mikron saani, Cleft Lip ba ku•chit dakani aro uandakgiparangko North Eastern Indira Gandhi Regional Institute of Health and Medical Sciences (NEIGRIHMS) Shillong, Bansara Eyecare Centre, Amrita Institute of Medical Sciences and Research Centre (AIMS) Kochi aro Mission Smile, Guwahati-o sanna watatskaaha ineba u•iataha.

DEIC-ni Tura-o ong•atgipa CHD screening camp-o Garo Hills-ni sak 14 surgery ka•na man•giparangoni Chuesa Marak-ba saksa ong•paa. Ia bi•sarangni surgery ba ka•tongko rate sananiko dakna MoU-o a•dok sorkari aro hospital-ni soi ka•gimin gita a•songni nambatgipa cardiologist-rangko seokaha.

“RBSK Scheme-ni ning•o pilak re•a-doani, dongchakani aro sanani korosrangko indin on•aha” ine State RBSK Consultant, NHM, Meghalaya, Johnson J Nongbet parakataha.

Chuesa Marak-ko surgery ka•a matchotani jasa ja•mano, ma•gipa uni rama-re•aniko aro ripengskarang baksa kal•grikaniko nike namen kusi ong•aniko parakataha. “Chinga da•ode Chuesa-ko skul watna gita biming segataha” ine mittelan gape Marinia R Marak parakataha.

“Surgery ka•ani ja•man uni be•eno tangsim tangsim dakgipa rongrang gimaangaha aro ma•gipa ong•e, anga angni demechikni rama re•e, apsan bilsini bi•saskarang baksa melie kal•grikaniko nike bilongen kusi ong•a” ine sangipa doctor-rangko bi•sani ma•gipa mittelataha.

Chuesa Marak da•o gipinrang gitan name janggi tangna gita man•ahani gimin uni ma•a-paa kusi ong•e DEIC-ona uni be•enko porikka ra•na aro simsakna gita da•onaba re•angrongenga ine u•iataha.