Shillong, September 21, 2022: East Khasi Hills a•jani ning•o ga•akgipa Dienglieng songni bilsi 80 ong•gipa budepa saksako sam man•a ine potchipenba so•ote galaha.
Kobor man•soani gitade, Monggolbar attamni 7 bajimango bilsi 17 ong•gipa pante saksa sianggipa Kwoi Diengdoh-ni nokona napdrae uko sam jakkale manderangni janggiko kal•ake roenga ine potdraenba gantongchi doke siataha.
Bilsi 17 ong•gipa panteko sing•sandion, uni ma•gipa ru•uta bilsirangna sakame roenga jeni a•sel ua Kwoi Diengdoh-ko sam jakkale ma•gipako kal•akenga ine potchipe ka•a chakna man•jae uko doke siataha.
So•otanio jak donggipa panteko pulisrang rim•enba Juvenile Home-ona watataha ine u•iataha.