Tura, Aug 18, 2022: Ja•manchake kobor man•ani gitade, West Garo Hills a•jani Dadenggre Sub Division-o donggipa Dadenggre Pulis Station-ni ning•o ga•akgipa Rebugre songo ma•sina man•gijagipa manderang me•apa saksako so•ote donangaha.
Koborna parakani gitade, re•anggipa August 10 tarik Budbar salo Rebugre songni saksa bilsi 67 ong•gipa me•apa Jiren B.Sangma Budbar pringo nokoni ong•atangaha, indiba ua attamo nokona sokbapiljaha. Nokni manderang uko ma•drangni nokchi re•angakon ine chanchie dongengachim, unbaksana Bristibar salo songsulo bia dongani gimin uchi re•angna nanga ine donaiaha. Indiba Bristibar attamoba nokona sokbajani gimin nokni manderang jajrenge songsul noksulrangchiko sandina a•bachengaha. Indake adita ru•ute baganrang aro buringoniko sandiani ja•mano attamni 6 bajimango uni sigimin manggisiko buringoniko nikaha ine aganaha.
Jensalo uamang Jiren Sangma-ni sigimin manggisiko nikaha bakan Dadenggre Pulis Station-ni pulisrangna kobor on•ataha aro ua walon Jiren sagini depante Billing Ch.Marak Dadenggre Pulis Station-o badi (FIR) ka•aha ineba aganaha.
Billing Marak-ni kobor ra•timgiparangna aganani gitade, pagipani sigimin manggisiko name nion, uni gittoko attechi den•ani dagi gangchim. Indiba Jiren Sangma-ko sawa so•otaha ma•sina man•kuja. Uko ma•sina man•gijagipa manderang so•ote donangna nanga ine chanchichipenga. Iani a•sel chong•motko da•odipet ma•sina man•kuja, pulisna badi ka•ani gimin pulisrang sandianiko dake kakket bichalko ra•bagen ka•dongsoenga.
“Sawamancha so•otachim, Chinga nikjani gimin darangkoba jaksi otna man•kuja. Uni gimin kakket bichalkode, pulisrang sandiani ja•manosa ma•siaignok” ine Jiren sagini depante Billing Marak agadapataha.