Tura, December 23, 2022: A•dokni Skotong Minister Conrad Sangma, ma•mong sorkarini kangal cholgrirangna on•atgipa PMAY (Low Cost House) aro bang•a scheme-rangni tangkarangko on•na nangchongmota ine Tura-ni MDC aro BJP Spokesperson Bernard N Marak dabiangaha.
“Prime Minister Narendra Modi, Media-rango parakatgipa, kangal cholgrirangna dakchakaniko on•atgipa scheme-rangni bidingo agantalatangaha, uni tarie on•atgipa scheme-rangko cha•bokna nangja. Pilak songni nokni manderang PM-ni on•atgipa Scheme-rangko ma•sia, indiba ua scheme-rangara maikai da•onan grassroot level-ona sokkujaenga ine Bernard Marak sing•doangaha.
Re•anggipa Robibar salo Narendra Modi-ni Shillong songjinmaona re•bae nama kattarangko aganprakangon, uni kamrangna Skotong Minister Conrad Sangma demittelle aganangskaha. PMAY Beneficiary-rangni tangkako on•genchimode, BJP dilgiparang bang•e vote-rangko man•gen ine kangal cholgrirangni tangkarangko on•jani kamara gualani ong•a aro kragijani kam ong•a. Unbaksana Scheme-ni tangkarangko chu•gimik Modi ra•angpilaha aro NPP dolna vote-ko on•osa tangkarangko man•gen ine agananiara ra•chakna man•gijagipa kam ong•a. Indakgipa kattarangko knagenchimode, gipin dolni dagrangako man•ode, BJP Office-ona re•bae kobor on•ena nanga. Grassroot Level-o BJP dolni dilgiparangko kal•ake aro tol•e kattarangko gipataniko dontongna nangchongmota” ine Bernard Marak janapataha.