AHAM Takuranbari songo ong•enggipa obostani bidingo Skotong Minister-na lekka sedoa
Tura, December 23, 2022: A•chik Holistic Awakening Movement (AHAM) South Western Zone, Ampati-ni General Secretary Wester Momin Takunbari A•khing-o niamgri nok rike dongenggipa Assam sorkarini gita Jal Jeevan Mission (JJM) aro PMAY (Low cost House) Scheme-rangko kam ka•angani gimin South West Garo Hills a•jani Deputy Commissioner-ni jak gita a•dokni Skotong Minister Conrad Sangma-na lekka sedoataha.
AHAM South West Zone, Takuranbari A•king Nokma apsan bakrime Skotong Minister Conrad Sangma-na lekka sedoate, Takuranbari songo ong•enggipa obostani bidingo janapataha.
“December 16 tariko AHAM aro Takuranbari songni A•king Nokma, rorirangni niam gri nok rike dongenggipa Takuranbari aro Ichakuri songona re•ange nieaha. Takuranbari songni map wa•rengko nigenchimode, rori jatrangni songdong a•chaenggipa biaprang Meghalaya a•dokni ning•osa ga•aka, indiba niam gri napdrae songdongenggipa manderang Assam a•dokni document-rangko mesoke a•arangko a•kangaha. Uasan ong•aigija Assam sorkariba ia songona Jal Jeevan Mission (JJM) aro PMAY scheme-rangko sokatenga. Ua manderang A•songni dongimin niam Sixth Schedule-ni Article 244 (2) aro 275 (1)-ko pe•ani ong•a” ine janapataha.
Uni gimin AHAM, Takuranbari songo ong•enggipa obostani bidingo ta•rake sing•sandianiko dake ja•ku de•aniko dakchina dilgiparangko mol•molataha.