Shillong, July 26, 2022: Meghalaya a•dokni BJP President, Ernest Mawrie Tura-ni MDC Bernard Marak-ni kosako badi ka•giminko ra•pilchina aro uni janggina chel•chakchina a•dok sorkariko didiataha. Mawrie-ni u•iatani gitade, BJP dolni bimingko nosto ka•na miksongesa iandakgipa ja•kuko de•aha.
Pulisrang July 22 tariko, Bernard Marak-ni bagano rike donenggipa Home Stay-ko ‘Brothel’ ba me•chikrangni denggu dakram nok ine potchipe chadrapaha.
Robibar salo, a•dokni BJP dolrang Bernard Marak-na chakaniko mesoke uni baganko maming warrant gri chadrapani ba raid ka•aniko raken jegalataha.
“Anga Tura-ni bang•a skia poraia man•gipa aro songsaro mande ra•ako man•gipa manderang baksa ia obostani bidingo agangolpogrikaha. Uamang baksa agangolpogrikanio, Bernard Marak-ko ia obostao pulisrang aro political dol jinma ku•mongesa galonaha aro uni bimingko nosto ong•atna jotton ka•anisan ong•aia” ine Mawrie aganataha.
BJP dolni dilgipa jean Skotong Minister Conrad Sangma-ni Advisor ong•achim, uni u•iata gitade, Rimpu Bagano donggipa gadang gittam buildingko pulisrang raid ka•aha. Indake ua buildingni ka•mabatgipa gadangko tom•anirangko ong•atana hall dake jakkalengachim, buildingni skanggipa gadango kuturi ge 30 donga, jekon Home Stay-na jakkalengachim, gnigipa gadango Garo Hills-ni bang•a kangal cholgri bi•sarangko rimbae poraiatenga. Bernard-ni aganani gitade, corona a•bachengaonin ua bi•sarangko rimbae noko donenga aro poraiatengachim.
“Puliseangni rim•anggipa sak bong•a bi•sarangko Bernard Marak an•tangan poraiatenga. Uamangoni mitam Edenbari Skul aro mitam Auxillium Convent Secondary Skulo poraiengachim. Indake uamangko nirokenggipa me•chikma saksa aro uni bi•sakoba pulisrang rim•angaha. Unbaksana bagano cha•ani (fastfood) dokkan dakenggipa bia ka•gimin jiksesakoba rim•chapangaha. Je manderangkon pulisrang July 22 walo rim•angahachim, uamangoni mitamrang tangka gammesa ripengska baksa an•senge roenga. Indake uamangni rim•gipa garirangba Rimpu Bagano rona re•bagipa manderangni garirangsa ong•achim. Tura songjinmani bang•a manderang Rimpu baganona chuttini salrango re•bae roronga. Indake ia resort-o rona re•bagipa manderang mande ra•ako man•gipa nokdangni manderang ong•a, uamang sorok a•samrango skatang rona sikjae an•tangni manko rakkina tangka gamme ripengskarang baksa roronga. Indake ripengska baksa rogipa biapko brothel ba pale cha•gipa biap ine agananiara kraani ong•chongmotja. Kangal cholgri bi•sarangko uamang ong•gija bimingko on•aha. Ian kragijani kam ong•a. Rimpu Baganko bilsi gittamonin chalaibaengaha, indide ua somoirango pulisrang maina raid ka•skaja ? Eleksin sepangmiting somoiosa raid ka•na nikama. BJP State Vice President aro Garo Hills-ni Convenor, Bernard Marak-ko namgija kam ka•enga aro bi•sarangko namgija kamko ka•atna rakkienga ine agananira kraani ong•chongmotja. Garo Hills a•jao uko namnikgiparang aro una chakenggipa manderangni bang•roroaniko nike, uni bimingko nosto ong•atna uko kal•ake roaha” ine Ernest Mawrie janapataha.
Unbaksana Bernard Marak-ni u•iatani gitade, raid ka•na walsa skang WGH a•jani NPP Youth-rang uni bimingko lekkarango ong•gija kattarangko seenba, ramani pakmarango tape donangaha. Uasan ong•aigija Bernard Marak-ni ma•gipani nokko pulisrang maming warrang gri raid ka•e neng•nikako on•aha. Bernard Marak an•tangni janggina kenne dongenga ine u•iataha.
Uni gimin sorkari Bernard Marak-ni janggiko naljokatchina aro uni kosako segatgimin badi ka•anirangko ra•pilchina Ernest Mawrie sorkariko mol•molataha.