Tura, July 26, 2022: A•chik Holistic Awakening Movement Central Executive Board (AHAM-CEB), YouTuber The Tall Trotter baksa Tura-o ong•anggipa obostako raken jegalataha.
“Ia ong•anggipa obostani bidingo pulisrang che•em che•em sing•sandina nanga. Mande sakgnini a•sel Tura songjinma gimikko namgija biming man•ataha. An•ching A•chikrang a•paloni re•bagipa pilak jat, pilak mandeko mikkang nitegija ka•sae mande ra•esa rimchaksoronga. Indiba Tura-o dongenggipa sakgni gipin jatni a•sel songjinmani manderang chu•gimik namgija bimingko man•aha. Ua video-ko nisoenggipa gipin a•dokni manderang Tura songjinmani gimin ong•gija chanchisretgnok aro re•bae roramna kengnok.
Uni gimin dos dakgipa sakgni manderangko pulisrang ta•raken rim•na nanga aro uamangko kamni kri sasti on•na nanga. An•ching a•jani nitoaniko nina re•baenggipa tourist-rangko indake kal•ake rogenchimode, Tourism maming dakeba tangdojawa” ine AHAM CEB-ni President Georgeprince Ch Momin janapataha.
AHAM dos dakgipa Tura-ni gipin jat sakgniko ua YouTuber-o kema bi•china ge•etangaha.
Uamang sakgnini a•sel Tura songjinmao songdongenggipa A•chik jatni biming nosto ong•aha. Uasan ong•aigija uamang YouTuber, The Tall Trotter-ni kosako ong•gija dos dakgipa sakgni manderangko badi ka•angchina gitaba mol•molangaha.
Una agreba AHAM dol, The Tall Trotter-ni video-o Tura songjinmani gimin agangipa ong•gija kattarangko ra•gale galchina ge•etangaha. Ua saksa sakgni manderang uni kosako ong•gija dakani a•sel Tura songjinmani manderangko biming man•ataniara kraani ong•chongmotja ineba Momin agandapataha.