Williamnagar, August 7, 2022: GSU Williamnagar Zone-ni President Saljrang Tengrik R Marak-ni u•iatani gitade, MeECL Department uamangni dabianirangko knachakjaenga aro maming aganchakaniko on•kujaenga ine u•iataha.
“Chinga sal 9-na kingking Williamnagar songjinmani MeECL Office-ko picketing ka•aha, indiba uamang chingni dabianiko knachakjaenga. Chinga 2020 bilsio a•dokni Skotong Minister Conrad Sangma aro Opposition dolni dilgipa Dr Mukul Sangma-na chingni dabianirangko see memorandum-ko on•ahachim. Indake June jani 27 tarikoba Power Minister-na lekka sedoataha, indiba Department-ni Authority maming aganchakaniko on•kuja” ine Saljrang Tengrik R Marak u•iataha.
Sorkari maming aganchakaniko on•kujani gimin East Garo Hills a•jani NGO-rang apsan nangrime July 30 tariko tom•aniko ong•atenba August 3 tarikoni 5 tarikona Office picketing ka•taiaha. Indita chang jingjengataniko dakahaoba sorkari aro department maming aganchakaniko on•kujaengani gimin rakbata ja•kurang de•angkugen ineba NGO-rang parakataha.