Tura, June 13, 2022: Skotong Minister Conrad K Sangma, unbaksana North Tura-ni MLA aro Skotong Minister-ni agan-ku•pattitimgipa (Adviser) Thomas A Sangma, Sombar salo state-wide Payment for Ecosystem Services (PES) Scheme-ko a•bachengate on•anga baksa FOCUS-ni gita gamme ge•e cha•giparang ba Producers Group (PG)-rangna cheque-rangko suale on•angjolaha.
Ia tom•aniko Tura Dakkopgre-o donggipa SMELC buildingo ong•atangaha. Ia Scheme-ko oprake on•engon, Conrad Sangma PES-ni gamchataniko jinmana parakangaha. Ia scheme bang•a buring bolgrimrangko ripingna dakchakanggen aro ge•e gamme cha•giparangna uamangni nanga pilakon chu•onge on•na jotton ka•gen ine aganangaha.
“Batanggimin bilsi 4-ni somoio NPP dolni rikenggipa MDA sorkari ge•e gamme cha•giparangna dingtang dingtang scheme-rangni gita bang•a dakchakanirangko on•aha. Songni nokni dilgiparang, Volunteer-rangko seokenba songni buring bolgrimrangko ripingna kamrangko ka•china didiangaha. Uamangna PES-ni gita buring bolgrimrangko ripinganina hector prako gong hajar 15-ko on•anggen ineba aganangaha. Sorkari kror 50 tangkarangko buring bolgrimrangko ripingna kamrangko ka•na bilsi prakna chamaha” ine Conrad Sangma agandapangaha.
Skotong Minister-ni Agan Ku•pattitimgipa (Chief Adviser), Thomas A. Sangma Village Natural Resources Management-ni kamrangko aganprake on•angan baksana, Himachal Pradesh-ni ja•man, Meghalaya a•dokan PES-ko ra•gatchenggipa ong•a ine aganangaha.
Baladinggre songni A•khing Nokma jean PES-ni membor ong•achim, ua buring bolgrimrangko aro chiring chibisikrangko ripinge rakkichina manderangko didiangaha.