SSA skigiparang Chief Minister-ni office mikkango okgimu chake jingjengata
Tura, December 2, 2021: All Garo Hills SSA School Teachers Association (AGHSSASTA), uamangni tik ka•gimin gita December 1 Butbar salo Chief Minister Office mikkang Tura Dakkopgre-o okgimu chake jingjengataniko dakangaha.
A•dok sorkari SSA skulo skigiparangni dormaharangko re•anggipa June jaoni November jaona, jadok ong•piloba on•jaengani gimin Tura-o donggipa Chief Minister Office mikkango jinma tom•dake okgimu chakaniko dakangaha.
SSA skigiparang batanggimin salrango changni chang uamangni dormaharangko on•china dabie jingjengataniko dakahachim, indiba a•dok sorkari jadok batangpiloba skigiparangni dormaharangko on•kuja ine parakataha.
“Chinga da•alo maini gimin iano tom•dakenga, pilakan ma•sia, chinga batanggipa salrango changni chang skigiparangni dormaharangko on•china dabie memorandum-rangko skotong minister aro education minister-na on•aha, indiba da•alona king king chingni dormaharangko on•kuja. Ian aiao inmanpilani kam ong•a, a•dok sorkari SSA skigiparangko kal•steka agrejok. Chinga nokdango bang•a neng•nikanirangko man•na baksana chingni dedrangko skul admission ka•na, monthly fee-rangko gamna man•jae chingni bi•sarang poraiani bon•chipjok.
Chinga cha•a ringa gri duk chake kamko ka•na nangenga, indiba sorkari chingni dukko ma•sichakja.Uni gimin anga da•alo AGHSSASTA-ni palo skotong minister Conrad Sangma aro education minister Lhakmen Rymbui-na ku•rang on•atna sika, chingni man•na nangenggipa jadokni dormaharangko chu•gimik on•pachina mol•molatenga” ine AGHSSASTA-ni President, LG Momin parakataha.
SSA skigiparang okgimu chake jingjengataniko dakani salo uamangni neng•nikaniko janape DC-ni jak gita chitti sedoataiaha. Uni gisepon a•dok sorkari SSA skigiparangni dabianiko knachakja ong•ode, mikkangchi rakbata ja•kurangko de•e, SSA skigiparangni dormahako on•kuja dipetna sima ari dongija indefinite hunger strike ba okgimu chake jingjengataniko dakangtaigen ine AGHSSASTA-ni Publicity Secretary, Bunbunbirth Marak parakataha.