Shillong, March 16, 2022: Adita bilsirangna kam ka•gija galchipe donenggipa, Baljek Airport-o sildorengni ramako tarina gita km 2.2 a•arangko nangdapgen ine Conrad Sangma Budget Session-o aganaha.
Umroi Airport-o minggni neng•nikanirangko chagrongenga, Sildorengni bilchakatgipa rama kan•dika aro wilwilao donggipa a•brirangni a•sel Instrument Landing System (ILS)-ko jakkalna man•jaenga ineba ua agandapangaha.
Kharkutta elekkani MLA, Rupert Momin Baljek Airport-ni bidingo janapangahaon, ua Transport Minister Dasakhiatbha Lamare-na uni kamko gisik ra•atpile aganengon, ia Airport-ko tarina gita 1995 bilsion sorkari gong 12.52 kror tangkarangko chamataha aro 2008 bilsio oprake on•aha. Lamare, una aganchakengon, Transport Department-ni manderang silchidoreng-ko bilatna raken kamko ka•enga aro ta•raken bilatna miksongenga ine aganangskaha.
Iani gisepon, Conrad Sangma, Balek Airport-na a•arangko nangdapenga, jedakode sildorengni bilchakram ramako rodapatna man•gen. Umroi Airport gita Baljek Airport-de a•brirang dongja aro kam matchotahaode sildoreng maming neng•nikani gri bilonna man•gen ineba ua aganangaha.