Tura, March 16, 2022: West Garo Hills a•jani Deputy Commisioner of Supply Department aro Dalu C&RD Block-ni ning•o donggipa Thokapara songo World Consumer Rights Day-ko gisik ra•e “Fair Digital Finance”-ko katta bichong donne tom•bimonganiko ong•atangaha.
Ia tom•bimonganiona bang•a Fair Price Dokkan-ni nokgiparang aro Committee membor-rang bakko ra•angtokaha. Indake ia tom•bimonganio MCS Officer, Cheman D Shira, mongsonggipa sokgipa ong•e, tom•aona sokbagipa manderangko online gita tangkarangko watanio aro bading chiwalanio darangni cha•bokako man•jachina simsake tangkarangko watchina aro bading chiwalchina didiangaha.
South West Garo Hills a•jani Food Safety Officer, Sainira S Marak cha•anirangko simsake cha•china ringchina didiangan baksana cha•anirangko breon name niesa aro be•enna ua cha•ani mai namgniko on•gen uko chekesa brena nanga ine aganangskaha.Unbaksana Inspector of Legal Metrology, Rakseng K Marak, Legal Metrology-ni kamrangko agantalate on•angaha aro cha•anirangko breon kg,dam,tariani tarik aro tarik badegiminko name niesa brena nanga ine aganaha.
Ia tom•anio Superentindent of Supply, Juniko K Marak National Food Security Act 2013-ni bidingo agantalate on•angskaha aro NFSA beneficiaries-rangna jaanti sorkari sualenggipa mirongrangko man•na Aadhar card-ko tarie ra•china mol•molangaha.
Indake Dalu C&RD Block-ni BDO Dr. Uttam Tamo Ch Sangma aro District Commission-ni membor Luna A Sangma-ba ia tom•anio bakko ra•e jinmana agan-talate on•angaha.UIDAI-ni District Nodal Officer-ba ia salo NFSA beneficiaries-rangna National Food Security Act 2013-ni gita Aadhar Card-ko tarie ra•chinaba cholko on•angjolaha.